رصيدك في حياتك سمعتك مع طيبين الفال
رجال الطيب والمعروف بالمـــعروف عاملها
ولا تبدي بجاهك في مقام ما يسر الحال
ولا تشفع لناسٍ ما تنومسك بفــعايلها
ليا جاتك تعذّرها مدام العذر له مدخال
ووقت الجد قول لها الصحيح ولا تجاملها
وخذ مني نصيحة لا تصدق كل ما ينقال
يجرك للنميمة ليـن يطرحك بحبايلها
يجيلك ناقل النمّات بهروجٍ تغث البال
سوالف في قفاك وحظك أطيب يوم تجهلها
يبرّر بالحمـــية والصداقة شينـــــة الأفعال
يجمّل صورته بعلومه اللي ما تجـــــمّلها
ولو كانت حميّه فيك رد المخطيه في الحال
ولا كان استمعها في قفاك وجــاك شايلها
ترى من جاب لك ودّى وهذي عادة النقال
يحاول يقتنص من فمك كلمة لأجل ينقلها
ومثل ما قال عندك راح عنك وعند غيرك قال
وزوّد عشر فــــوق الكلمة اللي كنت قايلها
تجنّب مجلسه لا تجلس إلّا مع كريم خصال
تحمّل ميلته وإن ملـــــــت ميلتك يتحمّلها
يتبــــــــــع
|