من اروع ما قيل....

سلام وتحيه للديره الحيه=اللي قضينا بها ايام الاعيادي
خضر ضواحيها والرب حاليها=ما كفها الضلع والعرق والوادي
العلم مبداها والشرع يزهاها=مصيونة العرض من عصر الاجدادي
فيها حبيب لي بالود صافي لي=انا مراده وهو غاية مرادي
عمري مشاركني بالعطف مالكني=فيض وقيس بعد حل بفوادي
غصبن لك المنه ياحوري الجنه=قم حط في رجلي عقال وقيادي
النوم حاربني والسهر صاحبني=دمعي على خدي اجواز وافرادي
كفي على كفي مجروح ومخفي=اخاف من هرج عاذل وحسادي
هذي سنه هجري والاعيان تجري=والفكر في وسط بحر الهوا غادي
ليلي مضى كله وانا بطاري له=سيرة حبيبي تغلق وتنعادي
يامعطي الحسنا حرقت محامسنا=ينقص على اهل الهوى بن وقنادي
شفقن على الغايب قلبي منه ذايب=ذوب الحديد ان تولاه حدادي
وجعان من حبه واردي شفا طبه=والحب معروف من عصر شدادي
لو صاحبي يدري عن ما حوى صدري=من هم وحزون وغبون واجهادي
ما كان يشقيني البعد يكفيني=القلب مليان ما عاد يزدادي
لو زاد يتكسر جذعه ويتخسر=والشمل ما فرقه غير الابعادي..

مما راق لي لشاعر الوطن الكبير:خلف بن هذال...