هدية الاربعاء...

البارحه يانور عيني خنجر اعتابك حديد £ توميبها وليا اسهبت بين الضلوع اركيتها

حكم الغلا خلاك تطعني وانا اللي مستفيد £ فديتك انت وكل طعنه من يدك فديتها
محبتك تجري بدمي من وريد الى وريد £ بين الضلوع العوج بخشتها وقلبي بيتها
لينت لك قلبن لغيرك ما يلينه الحديد £ ولديت لك عينٍ لغيرك ما بعد لديتها
وغنيت فيك النادرات الشاردات من القصيد £ اللي تثير الصمت فالجمهور لا عديتها
ونشرتها بشهر مجله للقريب وللبعيد £ على غلاف المختلف كلٍ قرا مانشيتها
عقدٍ يليق بجيدك اللي فارقٍ عن كل جيد £ والشفه اللي هرجها معسول يخرب بيتها
لا قلت اريد وقالت آمر قلت ما ادري ويش اريد £ قالت علامك قلت انا بغيتها واخطيتها
مره من المرات في ليلٍ نسانيسه جليد £ هزتني الذكرى وسرتني وانا سريتها
مدري بطل مدري خبل مدري ذكي مدري بليد £ مير المهم ان العنود اليا دعتني جيتها
وان شفتها عقب التعب والليل والبرد الشديد £ اقول ياليت الليالي كلها ياليتها
مرت شقاها للشقي ولذة سعدها للسعيد £ والذ منها الجمره اللي في يدي ضميتها...


مما ارق لي...