جبل بونشاك الفتاك . سفرتي لاندونسيا . قبل اسابيع .

الغـالي همس الثلوج :
شكرا لك .. ولتواجدك العذب يالغالي ..

الغاليه لولي :
ايه مره مثلنا .. لدرجه اني ماشوف الشمس هناك ابد
مثل السـعوديه بالضبط .. والله يشهد اني
اضغط ع نفسي انزل الصور علشانك وعلشان اللي يتابعون
ويشرفني كثييير ان مثلك يتـابع ... لاهنتي ..


الرآئعه دمي اصفر :
ان شاءالله باقي عندي الكثير , وافضل من ذولي ..
لكن مشكلتي انا بالإهمـال يعني عادي اكون مصور 90 صوره
من اجمل الصور .. وبغباء مني احذفهم بلا قصد ..
لكن ان شاءالله هذاني اجهز البقيه
حتى انزلهم .. ويشرفني كثير كثير انك تتابعي يالغاليه .



شوي وبنزل
عن حديقه الزهور ..

اليوم الأثنين .. يـوم درآسه وعمل باندونيسيا يعني مافي
زحمـه مثل امس وقبل امس .. ولا في تقفيل
شـوارع ولا شي ..


هالمره الاتجـاه لـحـديقه الزهور ..
الجذابه .. وخلوني قبل الصور اتكلم شوي عنها بس ..
هذي حديقه كبيره جدا .. من انواع الزهـور . طبعا الدخول بسعر
رمزي بس مدري كم نسيته .. منظمه بشكل كبير , وتعد من افضل الحدائق
بالعـالم .. كل شي فيها منسق ومنظم ومرتب ومنمق ..
بشكل خيالي ويجذبك بصـراحه حتى اللي
مايحب الامور ذي راح يعجب
بطريقه التنظيم . والنظافه وطريقه الترتيب وشكل الزهور
والورود .. وفي قسم خاص محمي فيه ورود خاصه طبعا الدخول لها
من وسط الحديقه وبسعر رمزي ...

ممرات وآسعه وشرحه .. وتشكيل الزهور على جميع الاشكال ..
الأرنب والديناصور , والحمأر وانتم بكرامه
وكل شي .. وفيها سماعات بكل مسافه تعديها مشغلين
موسيقى هاديه جدا تعطيك جو مع المطر
صرآحه ..


انا رحت لها الصباح طبعا
لان كل شغلنا صباحي مافي شي في الليل ابدا
كل شي الصباح والعالم تحصلهم من الساعه 6 صاحين ..
نفس الطريقه مع السواق لكن هالمره غيرته
لان السواق الاول نزل يجيب واحد
من مطار في جاكرتا .






هذي في بدايه المدخل
ساعه كبيره تحتها زهـور .. بطريقه حلوه ..
لكن بكتب المشكله اللي صارت ( اذا انتهيت من الصور هذي ان شاءالله )







بـالشكل هذا تكون ( الممرآت ) ..
بجمـاليه جذآبه .. السماعات شوفو اقرب شي من الجهه اليسرى لعزيزي المُشاهد







الخشـه ماهي وآضحه علشان كذا
مامسحت وقلقت بنفس الوقت يعني ان شاءالله انها نظآميه
عموما شوفو شكل الديناصور من الزهـور ..







مسوي مُخرج اللي مصورني
الله يعدي عنه برضو من الـزهور والورود هالشي الكبير < خكري






هذا برضو حمـار وانتم بكرامه
مع العربه حقته من الزهور والحركـآت ذي ..
صوره بعجله لانه هل المطر هل




من أول مادخلت الحـديقه في غيـوم واصوات رعد
بعدين بنص الجـوله ضرب المطر .. بقوه وكان فيه شباب
اندونيسين .. انحاوشو من المطر لهالجلسه , فقلت فرصه
خلني اجلس معهم واشوف وش هي اصولهم
وش يرجعون له





طبعا
الاخ اللي فوقه خط اسـود
هذا من جزيره بالي تبعد عن جاكرتا بالطيارن ساعتين
مشهوره بشاطي كـوتا . وفيها الخواجات بكثره كل اوربا
هناك .. ومشـهوره بالفســاد المهووووول
والشاطي حقهم يسمى بشاطي العُراه .
اكيد انكم تعرفونها ..

هذولا يتكلمون اللغه العربيه الفُصحى
ومن الناس المتشددين في الدين بقوه . طابين ع وجيهم
بالمعنى العربي والأخ اللي فوقه خط اسود
اقول من اين انت , قالي انا من بالي , قلت ولما انت هنا
اذاً قال ( هاجرتها من الفسق والفجور ) وسأعود
بإذن الله اطهرها .. اثابه الله والله يقويه .
كلهم يدرسون اللغه العربيه
علشان القرآن , وبنفس الوقت متحمسين
بقوه للدين يعني لو تجي تقول لهم فجرو بنادي الزعيق
وتدخلون الجنـه جو يمشوون الف بغيت اسويها
بس خفت ^_^






خف المطر
وطلعت انا وسلمت عليهم ع امل اللقاء بهم في المستقبل
البعيد بإذن الله المهم كملت الجوله لكن صار
شي قلب مـوازين الجوله كلها ..


مشيت لمده ساعه تقريبا
فشفت ملعب يسار فيه اندونيسين يلعبون كوره
مع سعودين .. فحشرتها معهم ..





بهذي الصوره
اتبع السهم , لتصل الى صاحب هذا المُعرف ..


مثل ماقلت لكم
كان قبل امطار غزيره
فصار الملعب كلـه طين بطين
المهم حشرتها شوي والكلام كله شقلبه في شقلبه
اللي ع خشته واللي ع ظهره .. وانا هادي جدا ماطحت
وحذر بالمشي .. فجاء اوفر كذا وانا رآس حربه
لعلي نسيت الطين وتذكرت الهدف وسويت اني متشرب الارتقائات شرب
وهزت شعوري ربطه النصر اللي في يدي , قلت لازم
تنقز عالياً كالاسطوره ماجد وتجيب هالقون
ذا

وفعلا والله ونقزت عاليا
بس ماضربت الكوره , ولا شفت الكوره اساسا
كل اللي اتذكره خشه اللي عطاني اوفر , ماوقفتني الا شجره ورى المرمى ..
دووووب .. وتقطع البنطلون والعالم تضحك .. وانا فيني الصيحه
صرآحه لانها ضربه عنيفه , وجتني جروح في جسمي
وبالكاد قمت . واعرج . وحالتي حاله ..
وتجمعو عندي . وقوموني . وبشويش امشي لين
طلعت ورجعت للفيلا وانا مالي خلق
شي ابد من الوجع اللي فيني
لكن الحمدلله سلامات
جت مافي اصابه بليغه وهذا اللي قلب كل شي

هذي نهآيه المهايط
والطيش خسرت يوم من اجمل الايام
علشان اسجل قول ع اندونيسي لا بارك الله فيه كررره .



وانتهت رحلتي بهذا التفصيل
وانتهى يـوم الاثنين بحديـقه الزهور ..
طبعا انا قلت لكن في بدايه التقرير هو اللي خرب شوي
الجوله ذي ( دخلت الحديقه ) ومعظم الاشياء
تحت الصيانه وهذا اللي خلاني ماصور
كثير , المناظر ..


لانو كان قبل سنتين
شي خيـالي وتوحف حقيقيه ومناظر جذابه ..


بكرا ان شاءالله
بنتقل لفيلا جديده .. فيها الصور الجذابه
بقوووه وكثيره .. ان شاءالله اعطيكم التقرير باقرب وقت .


اكتفي
بالتعبير بهذي الابيات


جــرح على جرح كفى الله شــره ...
والجرح فوق الجرح يبطي عـلاجـه ...
ولا قلت رآح الجرح جتنــا المسره ...
اثر العجـاجــه تقتفيها عجـاجـه ...



نسيت شي
في صور في الحديقه وغيرها
لكن لو عدلت فيها ولا مسحت فيها تخرب
علشان كذا اجيب الصور اللي مافيها
مثلي راز خشته :tongue:


شي مهم بعد نسيته
لاني بغير الفيلا حصلت هالصوره ذي
في الجوال وقلت لازم ننزلها



النصر متكي معي تمام التكيه ..
ومبسوط بعد والمطر واضح ولا فيه مجال للشك شوفو
المسبح والفُقاعات ..

ماشالله عليك وووصف ممتع ورحله امتع استمتعت وكأني معك بالرحله
الله يهنيك ويسعدك

ماشاء الله رووووعه,,اوما تفجر بالهلال ههههه وانت بلأجواء هاي مانسيت الهلال ,,
يسلمووبنتظااااارك خيو,,
ومازلت متابعه..

هههه تقرير أبدااااااااااع وسرد للموضوع أكثر من رائع
وبجد مشوق وسوالفك ماتنمل
كوره بالقائم انت مبدع والابداع ملازم لك
أشك إنك مرشد سيااااااااحي لك بالهشقله؟؟!!
غاليتي لولي صور ومناظر خووووقاق
وشرأيك نطالبه بعد هالأغراء بتذكرتين لي ولك ؟؟؟!
وألف سلامه عليك يالاعبنا الكبيرههه مسوي فيها الكابتن ماجد ههه
متااااااااااابعين للآخر ,,,, يااااهي طلعت اندونيسا ماهي هينه

ووونننننآآآآسسسه عشششت جوو
مع سفره هههههههه
آتمنى سفرك آكثرآستمتآع
آستمممررر على تقرير
ونحن معك لآتنسى آننآ نستمتع بذآلك
تحيتي لك

ههههه دودي معاك حق انا وانتي متابعين وبقوه
وشدتنا المناظرالرووووعه ومن شان هيك بنطالب مشرفنا كوره
تذكرتين لي انا وانتي شورايك نقوله الحين ولانأجل السالفه بعدين
اخاف يبطل ماينزل الصورالباقيه^_^
جاري المتابعه...

الغاليـه دمي أصفر :
تواجدك هُنا ومتابعتك هي الابداع فعلا .. تعطي نكـه خـاصه وفريده المنظر
هههههههههه ماني مُرشد ولا ش مُجرد محب للسفر والوناسه .
تصدقي قعدت ساعه افـك عـبـاره ( هالشقله ) في الاخير اكتشفت اخيرا
بعد مُعنـاه انها الشغله ^_*
تستـاهلي التذكره انتي ولولي , بس المُشكله ان الجبل مافي اسواق ماتنفع يعني لكم
الله يسلمك .. سويت ماجد ثواني والنهـآيه بوسط شجره . اجل لو انا سويت ماجد لمده 1 ساعه شكلي بموت .
انـدونسيـآ بكل امـانه تستاهل كل شي
باللي فيها , ولا تمل ابدا ابدا ابدا
لو تروحي كـل شهر ماتملي منها .
بس تصلح عزآب افضل شي .
لاهنتي ع تواجدك يالغاليه .



اهلا هلا بالغاليه طبعي الوفـاء :
تـو الموضوع ينور بتواجدك يالغـاليه .. الله لايهينك ع التواجد والكلمـات الجميله ..
ان شاءالله بستمر ع التقرير , لاهنتي !!



الغاليه لولي :
تستاهلي الطياره بكبرها بس أجلي الموضوع
اخآف فعلا مآكمل وانحآش من أولها ..
الله لايهينك .. يالغاليه ع المتابعه . وتواجدك الرائع يعطيني رغبه بالاستمرار ..

الغالي شـأمخ النصر :
اعذرني ع التأخير ماشفت الرد مغمض شكلي وقتها .. الله يخليك يالغالي ع التواجد والدعوه الحـلوه
آمين ويـاك ..




الغـاليه لولي :
برضو ماشفت الرد لان يـبدو لي ان كان فيني نوم فضيع .. الا نـآسيه بس شفت ذولا قلت يازين من
ارســلهم يفجرون فيهم بحكم الحمآس اللي فيهم

تشرفـني متـابعتك !

اكمـل لكم ..
ع عجـاله .. وصلنا يوم الثلاثاء ..
يوم الثلاثاء هذا مافي شي يذكر لاني مارحت لشي ..
بس غيرت الفيلا .. رحت لثانيــه ..

الأولى كانت جميله
وخاصه , ولا حولك احد ولا ازعاج ولا شي ..
و5 غرف .. وكل شي فيها حلو ..


بس المشكله مافيها ( مطلات حلوه )
ولهذا السبب صرت ادور والتفت يمين ويسـار ..
عن فيلا يكون المطل فيها حلو ويشدك .. ورحت لمجمع
اشوفه .. وفعلا حصلت فيه فيلا هي الافضل
في المجمع بحكم مكانها .. والأهم
مسبح .. ومطل حلو ..



طبعا سعرها 500 الف روبيـه
يعني 200 ريال تقريباً وثلاث غرف مع دورات مياه
مع جلسه فوق خاصه .. وبلكونه والباقي
عاد صاله ومطبخ وطاوله كبيره ..
وكل الامور ذي ..


هذي صوره غـرفتي
طبعا كبيره جدا .. وتفتح النفس ع هالمنظر الجميل





انا طلعت من الفيلا الأولى الصباح ..
والجو كان غيوم وامطار خفيفه , جميله جدا وجذابه ..
واخذت هاللقطـآت من هالمطل ( الجميل )



بعد نفس هـالشي صور
للمطل , وللشكل الخـارجي للفيلا وكل صباح
استقبل هالمنظر .. الجذآب جداً ..








.. بـعد مـاخذت هالصور .. وحطيت الاغراض ..
طلعت من الباب امشي مليون ... وين رايح
وركض مبرحاً .. وارتفاع عالياً
ثــــم





للمسبح طبعاً بلهفه وشوق
لاني مامل صراحه من المسبح مدري ليش ..
مع ان المسبح بارد . والجـو بارد . وامطار بارده ..
وضباب بعض الأحيان حتى الاندونيسين
يقولون ليش تمرض تتعب ..
مع ذلك غصب
اسبح ^_^




هذي بعد الارتفاع
والهبوط الاضطراري لزيـاده الوزن




كنت
طبعا اسبح وكان المطر خفافي
ولا فيه صواعق ولا شي .. وبعدين دخل الضباب ..
وبعد الضباب اييييييييه صواعق
انححححش ..

واخذت الصوره كبدايه للسحاب ..



هذي بدآيه قـوه المطر ..
والصواعق .. وحده من هـ الصواعق ضربت
والله العظيم ان الطماطم بيدي والسكينه واركض بوسط الفيلا
وين رايح له مدري بس من الروعه .. ضربه ماهي
طبيعه , واقول الحمدلله اني طلعت من المسبح
ولا كان منهبل ولا احد درى عني ..



هذي الصوره للأمطار اللي هطلت بنفس اليوم ..
بعد تجمع السُحب , وقبل ماتضرب الصاعقه عندنا الله يسمت :biggrin:





في الاخير
دخل المقداد ابن عمر
وضرب طُحيلب ابن فجر ضرباً مبرحاً فانتهى كل شي ..
بــعد هذه الضربه القـاضيه ..
< حكاوتي باب الحاره احساس يعني .. :biggrinbiggrin:



هذي صور يوم الثلاثاء
مافي شي يذكر غير اللي قلت لكم عنه .. تغديت
وشربت الشاهي , والقهوه ع المغرب, وسمره حلوه .. بعدين
نمت الساعه 10 < بدأ السهر من اليوم

بكرا
بروح لحديقه الحيوان او مدينه سكابومي
للحين جالس افكر هذي او ذي
لاقررت اعلمكم 311):


اهداء سريع سريع :biggrin: :

لو جمعت ايـام عمري من فـــرح ...
ماتـسـاوي لحظه من وقتي معـاك ...