ليش كثير من دول العالم تنتهي ب ’ ستــآ ن :$

باكستان، أفغانستان، كازاخستان، طاجيكستان،، منو هذا ستان اللي قاط وجهه بكل هالدول؟

قصيت عليكم ماكو واحد اسمه ستان ، الموضوع كله ان اللغات الموجودة هالأيام كلها متفرعة من لغات بدائية قديمة. أحد اللغات البدائية القديمة كانت “البروتو-هند-أوروبية” – “Proto-Indo-European ********” ولما يترجمونها للعربي يقولون اسمها اللغة الهند أوروبية البدائية، وهي لغة غير مسجلة ترجع لفترة ما قبل التاريخ…
شنو يعني ما قبل التاريخ؟
ما قبل التاريخ الله يسلمكم يعني الفترة الزمنية اللي كانت قبل اختراع الكتابة، وبالتحديد ما بين عام 3400 وعام 3200 ق م, خلال هالفترة كانوا “يرسمون” للتعبير ونقل المعلومات بين الأفراد مثل الرسوم العبيطة اللي يحطون عنها بالعصور الحجرية داخل الكهوف وهالأماكن اللي مادري شلون صايره.
المهمممم، في هاللغة البدائية نشوف ان الجذر “ستان” أو “stā-” أو بالانجيزي “stand” دش في وايد من لغات اليوم وصار لفظها دارج عند وايد من الشعوب المختلفة. لما تقول “ستان” بالروسية تلقى معناها مستعمرة أو settlement، بعض اللغات السلافية معناها ولاية، بالانجليزي الجذر نفسه مستخدمينه بوايد كلمات منها “stand” و “state” و “stay”.
الشعوب المنحدرة من جهة الهند وإيران يستخدمون هالجذر للتعبير عن “مكان” أو “أرض الـ” وهو المعنى الأشهر عند الكل.
يعني لما نترجم أسماء الدول اللي فيها “ستان” حسب لغة أهلها نلقى المعنى:
1- أفغانستان = أفغان + ستان، الأفغان اسم لمجموعة عرقية تنحدر من من جذور شرق باكستان ومشهورين بإسم البشتون – Pashtun. ستان معناها أرض والناتج يصير أرض الأفغان،
2- كازاخستان = كازاخ + ستان، كازاخ هم إسم لمجموعة عرقية وهم كلمة مشتقة من التركية معناها “روح حرة” أو “مستقل”، وستان معناها أرض، النتيجة تصير أرض الكازاخ، وإذا نبي ناخذها حرفياً تصير أرض الروح الحرة أو الأرض المستقلة.
3- قيرغيزستان = قيرغيس + ستان، هم معناها أرض القيرغيس، قيرغيس كلمة من التركية للعدد أربعين، إشارة للأربعين قبيلة اللي اتحدوا على ايد البطل الأسطوري ماناس – Manas لتأسيس الدولة، حرفياً يقولون معناها “احنا أربعين” – “We are forty”. حتى علمهم الأحمر فيه شمس وتطلع منها أربعين شعاع مرسومين بالضبط على هالعدد.
4- باكستان = باك + ستان، باك في الأوردو معناها النقاء أو الطهارة، ستان يعني أرض والنتيجة أرض النقاء. ويقولون انها صدفة عجيبة شلون طلع معاهم اسم الدولة من أحرف الثقافات في المنطقة: Punjabi + Afghani +Kashmiri + Sindhi + Balochistan وصار بالأساس PAKSTAN بعدين ضافوا حرف الآي لتسهيل النطق. اللي طلع بفكرة الاسم هو ناشط سياسي مسلم اسمه چودھری رحمت علي سنة 1933م استخدمه لأول مرة في إحدى نشراته السياسية وبعدها تبنوا التسمية.
5- طاجيكستان = طاجك + ستان، أرض الطاجيك، الطاجيك تسمية تاريخية يشيرون فيها لغير الأتراك اللي يتكلمون لغات متشعبة من الفارسية.
6- تركمانستان = تركمان + ستان، أرض التركمان، تركمان حرفياً يقولون معناها “شبه أو أشباه الأتراك”.
7- أوزبكستان = أوزبك + ستان، أرض الأوزبك، يقولون اسم الأوزبك مأخوذ إما من اسم قائد القبيلة اللي وحّد جماعات المنطقة أو الاسم مكون من كلمات تركية معناها “سيد نفسه” – his own master.
معلومة أخيرة: هذي اللغة الهند أوروبية البدائية تقدر تقول عنها اهي الماما حق وايد من اللغات الأوروبية والآسيوية، مثل الهندية والأوردوية والبنغالية والإيرانية واليونانية والألبانية والأسبانية والإيطالية والفرنسية والبرتغالية والاسكتلندية والألمانية وحتى الانجليزية والفرنسية،،، وغيرها وايد بس طبعاً على حسب الترتيب بالتدرج من لغة إلى لغة. يقولون من بين كل سكان العالم اليوم اللي مجموعهم 7 مليار تقريبا فيهم 3 مليار يتكلمون لغات ترجع لهاللغة الأساسية. من جذي لقينا الجذر ستان بأكثر من دولةوبنفس المعنى.

منقول من : كميل
نوددآ

طرح جميل مره اشكرك يالغلا

آلآرروعع توآجدكك روححي

يعطيك العافية اختي العزيزة نـــوددآ
موضوع رائع وجميل

يعآفيك رببي منور آستآذي