أبي أنام بدري اليوم عشان وجهي ينور بكره .. !

في كتب الأطباء يقال أن ضحكة من القلب ونوم عميق هما أفضل علاج لأي علة !
– آيرش بروفيرب




كلنا جربنا نسهر مره ونروح لدواماتنا صباح اليوم الثاني ..


ها كيف الشعور ؟
كنتي متنحة بالكلاس ؟
خربطتي بالعمل وحطيتي شي مكان شي ؟
خبصتي بإختبارك ؟



عادي إنفجار قنبلة شيرنوبل النووية سببها موظف ما كان نايم كويس !



مو بس التشويش والعصبية تسببها قلة النوم ، لو أتكلم هنا لبكرا عن قد ايش النوم مهم وإنه ممكن يكون سبب بعد الله بعدم تطور بعض الأمراض المزمنة مثل :


مرض القلب
النوبة قلبية
السكتة قلبية
عدم انتظام ضربات القلب
ارتفاع ضغط الدم
السكتة الدماغية
داء السكري

ماراح أخلص , بعيد الشر عن الجميع .


لكن أنا بأمسك الموضوع من زاوية تجميلية تهمنا معشر البنات ..
باختصار سر جاذبية البعض وتألقهم مو خلطة وإلا كريم من صيدلية بوتس .. الموضوع كله هو مخدة وتسكيرة عين وحلم جميل !

لا تسألين عن كونسيلر !

قلة النوم والأرق هي اللي تخلي عيونك منفخة وهي اللي تطلع الدوائر السودا حولها ..
ومع الوقت الأرق بيكبرك 10 سنين قدام وبيطلع خطوط التجاعيد .
ليه ؟ لما الإنسان يكون مجهد وصاحي يبدأ الجسم يفرز هرمون الإجهاد الكورتيزول وهذا الهرمون يروح يكسر الكولاجين الموجود في البشرة ويفككها .. بالتالي بيطلع الضعف والتجاعيد .
وقت النوم برضو الجسم يفرز هرمون النمو ، بالصغار هذا الهرمون يساعد بنموهم أما بالكبار هرمون النمو يساعد بتقوية العظام وبناء العضلات ، لذلك بدون نوم كافي تقدرون تتوقعون إيش بيصير .





السهر يزيد الوزن !

فيه دراسة تقول إن فيه علاقة عكسية بين قلة النوم وزيادة الجوع والشهية ، بالتالي زيادة في الوزن.
الدراسة تقول إن الناس راعين السهر يميلون للنشويات والكربوهيدرات ولا يقدرون يقاومون الرغبة بالأكل .
في المستقبل القريب راح تكون ساعات النوم جزء أساسي من برنامج إنقاص الوزن .





الإنسان الطبيعي المفروض ينام من 7 إلى 8 ساعات .. بعضكم يمكن يقول أنا تعودت أنام 6 ساعات ومبسوط وعايش حياتي تمام .
لكن الدراسات تقول لما قاسوا القدرات الذهنية للناس اللي تعودوا ينامون ساعات قليلة أداءهم الذهني يتدهور بالتدريج .





السؤال الذهبي الآن كيف أحمي نفسي من الأرق وأنام كويس ؟

خلي تصميم غرفتك مثل فصلك أيام أولى ثانوي عشان يجيك النوم بسرعة


1- اضبطي الساعة البايولوجية بجسمك .

- حددي وقت للنوم وإلتزمي فيه حتى بأيام الإجازة .

- إذا كنتي متعودة ع السهر تدريجياً روحي لغرفتك بربع ساعة بدري .

- لو سهرتي يوم عوضي النقص بالنوم بقيلولة أول الظهر ماتتجاوز 40 دقيقة .





2- {وجعلنا الليل لباسا وجعلنا النهار معاشا} – سورة النبأ

- نامي الليل واصحي النهار ، والأهم بالنهار خلي عيونك تشوف الشمس .

- افتحي شبابيك البيت وخلي نور النهار يدخل .

- بالمساء وقبل ماتنامين سكري التلفزيون وابعدي أجهزة الجوال والتاب لتز – ممكن تقرئين كتاب ورقي أو تسمعين بود كاست صوتي ، لأن النور اللي يطلع من هذي الأجهزة منبه وممكن يسبب لك الأرق – .

- خلي أنوار غرفتك هادية استخدمي الأبجورات بلمبه لها واط منخفض .




3- عادات يومية ممكن تساعدك بالنوم نهاية اليوم .

- وقفي شرب القهوة والشاي بعد العصر ، بعض الناس يأثر فيهم الكافيين بقوة وممكن يحسون بالأرق 12 ساعة بعد آخر فنجان قهوة شربوه .

- تعشي خفيف ، التخمة تتعبك والجوع يخليك متضايقة ومو مرتاحة .

- لازم يكون يومك فيه رياضة .. الرياضة هي واحد من أقوى الأسباب اللي تخليني أنام بعمق بدون أرق .

- لاتشربين سوائل كثير قبل النوم عشان ماتتضايقين وتصحين تلبين نداء الطبيعة.






طقوسي ماقبل النوم .


- آخذ دش دافي ، واستمتع بكوب الشوكولاتة الدافية ، أقرأ كتاب أو أكتب إيش راح أسوي باليوم الجديد .

- أحط كريماتي الليلية .

كريم فينشي الليلي لبشرة الوجه بطل ، يخلي البشرة طرية وناعمة بشكل واضح فرق معي بأول استخدام ، اشتريته من وايتز سعره يمكن 160 – 200 بس يستاهل .


- أحب أنام على مخدتين وحده قطن قاسية شوي ومو عريضة وفوقها مخده ريش من آيكيا .


- أعطر المفرش مخدتي ، ريحة اللافندر معروفة إنها تستخدم وقت المساج والاسترخاء كنت أشغل فواحة بزيت اللافندر قبل ماأنام بس أحياناً أنساها وأنام وأنا ماأحب أخلي الشموع مشتغلة وأنا نايمة أخاف يصير شي لحد ما طحت على هالإختراع الرهيب من باث آند بودي ووركس .

الإختراع هذا إسمه معطر للمخدة ، بريحة اللافندر ، يجيب الاسترخاء والنعاس ممتاز جداً .
وبخصوص فايدة تعطير المخدة راح تحبون مقالة للكاتب فهد عامر الأحمدي (عطّر وسادتك قبل النوم) بجريدة الرياض .

- زي أغلب الناس على سطح الأرض الغرفة المريحة للنوم هي الغرفة الباردة اللي تهويتها كويسة أشغل المكيف على 22 درجة وألف نفسي بالبطانية الناعمة .


- إذا كان موقع بيتكم بعيد عن إزعاج الشوارع والسيارات وبكاء طفل الجيران فالحمد لله ، أما إذا جاركم اللي ساكن فوق أزعجك التلفزيون حقه فأنتي تقدرين تعملين ماسك للإزعاج وتشغلين المكيف .




نعست وأنا أكتب الموضوع هههههه
يارب تكونوا استفدتوا ، أتمنى تكتبون لي إيش طقوسكم قبل النوم .


وأحلام سعيدة يارب



منقول للفائده

طرح مفيد وجميل شكرا يالغلا ولاهنتي
بارك الله فيك

بارك الله فيك

يسلموو ع مروركم العطر

شكرا لك طبعي بس ابي اصحح معلومه
السهر يزيد الوزن
وربي مانام غيرالظهر
ومازاد وزني نحفت زياده
شكرا طبعي

هذا يالغلا دراسات تقول كذا
وهي بالاخير اكتشفت انه ماله علاقه النوم بالوزن
يسلمووو ع تعلقيك
يسلمو ع مروركم العطر