شـي مـا شـفـتـوه / ( النـصـر .. لاتـسـيـو )

السلام عليكم

ما أجمل أن تتابع النصر وأنت خآرج البلاد .. تحس بطعم غريب !

مزيج بين العَظَمَه .. و الكبريـاء !!

كان هناك أكثر من رابط بيني وبين النصر .. أجملها المطر

فكما كان لاعبوا النصر يبدعون تحت المطر .. كانت بآكستان أيضا" تمطر !

وهذه تضاف لـ ( باكستان ) .. ليزيد رصيد حبي لها

و

كانت هناك أشياء ماشفتوها .. أو بعضكم شاف بعضها

<---- أحس إنه بدأ يخربط

أبجيب بعض اللاعبين .. وأحط جنبهم أشياء شفتها عليهم

سأبدأ من الرآس الكبيره .. المدرب

..

..

زينقا

حتى هذه اللحظه .. يبدو لي أنه سيغير تفكير لاعبينا .. وحتى بعض الجمهور ربما !

تعجبني قراءته للمباراة بكل أوضاعها .. وقت المطر كانت خطته شبه دفاعيه و ( راكده )

بعد توقف المطر .. إنطلق النصر

وإن كنت أتمناها ( الشوط الأول شبه دفاع لإتعاب الفريق الآخر .. )

و الشوط الثاني ( هجوم عنيف .. لإستنزاف اللياقه القليله المتبقيه لدى الفريق الآخر ) !

عبدالله العنـزي

فيه من برود أعصاب مبروك زايد ..

لاعب يتعلم بسرعه .. وأخاف عليه فقط من الـ / زواج !

لأن أغلبنا يا أهل الشمال .. إذا أعرسنا دجينـا

الدفـآع

برنآوي

من زماااااااااان وأنا أقول لكل من حولي إنه ( سـلآح )

من القلائل اللي أطمئن إذا كانوا بالملعب

ماكين

مبدئيا" لا بآس .. وإن كانت حالته صعبه مع العرضيات ( كأنه سعودي )

الدوخي

كأنه سمنان شوي .. لايكون نآوي يعتزل بس !!

الخيبري

لازلت أتذكره في أول مباراه له معنا قدام الوصل .. كنت حاضر المباراه وتوقعت الهدف من قبل تنعكس الهجمه علينا .. أقسم بالله للحين أتذكر يوم إنه راح يركض مع هجمتنا والكوره طالعه من الجناح الأيمن .. وأنا أقول له

( إرجع .. إررررررررجع .. مالك دخل بالهجمه إرجع )

ماسمعني .. وجاء الهدف

وشكله بيقعد طول عمره مايسمعني

مشكلته مايصدق على الله تبدأ هجمه لنا .. تلقاه سابق المهاجمين !

لكن تعجبني جدا" جراءته بالقتال على الكوره .. كان ند قوي للخآل ( حقهم ) اليوم

>

القرني

أحبه جدا" هالآدمي .. خاصة أنه قاتل للوصول للنصر

ولأني أحبه جدا" .. أتمنى أن يترك النصر أو يطور نفسه بـ ( عنف )

لأني أخاف يجي يوم .. و أكرهه جدا" !!

لكن كورته لـ ( أبو قحط حقنا ) كانت خياليه .. يمكن نكتشف القرني بمركز جديد !

مع العلم إن مركزه الأصلي ( محور ) مو دفاع

الوسط

بيتري

بدأت أؤمن بأنه ( هتلر الوسط النصراوي )

هتلر أول حياته كان جندي عادي .. مر عليه ضابط وهو يرسم على الأرض .. قال الضابط لهتلر ( وش تسوي )

رد هتلر ( أرسم خطة .. عن كيفية ان احكم العالم )

شاته الضابط برجله وقاله ( رح إمسك خفارتك لأفقع وجهك )

لكن وش صار هتلر .. حكم العالم ( إلا شوي )

يبدو لي أن بيتري سيحكم الوسط ( و شوي )

رازفان

وانا اشوف المباراه .. فيه نآس تتابع معي

كلهم شهدوا لرازفان بالفشل وأنه ( ما سوى شي )

لكن ( ربما لتفاؤلي ) أشوفه كان ماسك مركزه .. ومغطي صح

صح ماطلع منه شي كثير .. لكنه ما أخطأ بشي كثير بعد

ذكرني بـ ( خميس العويران ) مع الهلال .. كان يمسك الوسط الدفاعي الهلالي رغم أن إسمه مايمر إلا قلييييييييل على لسان المذيع .. كان الجندي المجهول للوسط الهلالي .. وهذا ما أتمناه مع رازفان

فيقاروا

لم يتغير عن العام الماضي

والعام الماضي كان جيد جدا" .. وربما أكثر بقليل

أحمد عبـّاس

لاعب عنده ( مـِر )

رغم أنه فاكهة معسكر فريقنا .. والوحيد صاحب القفشات .. إلا إنه جدي جدا" بالملعب

قلتها .. و أكررها الآن

( الحمدلله أن الهلاليين والطائيين .. ماقدروك حق قدرك )

الهجـوم

سعد الحارثي

مشكلته أنه لايعرف كيف يتصرف أثناء انطلاقة الهجمه

ومشكلته أيضا" أنه يحتاج لتسجيل هدف في بداية كل مباراه .. ليبدع في المباراه كامله

تمريرة الهدف كانت رائعة ( جدا" أوي ) منه للسهلاوي .. لأنها ( تنقيزه )

لكنه طفى .. ويمكن البعض يتساءل ليه النصر مسك اللعب أكثر بعد ماطلع سعد !

لأن المهاجم لما يشغل الدفاع .. يضطر الفريق الآخر لمساندة دفاعه وبالتالي يخف الضغط في نص الملعب .. فيملك فريق ( المهاجم ) الملعب بأكمله

تماما" كما حدث مع ريان بعد مانزل .. كان يركض في كل مكان

استغل كوره شبه ميته .. جاء منها ركني .. فـ ( هدف )

السهلاوي

أتذكر صورته اللي بالمعسكر .. يوم يقمز على الكوره وهي بالهوا

الصوره خياليه .. واللاعب متطور ( لياقيا" ) بشكل أكبر

يملك نفس طويل بالبحث عن أنصاف الفرص .. والدليل الهدف الثاني هو من صلح الكوره براسه

عيبه أن لايستغل ( السبرينت ) اللي عنده

يعني هو صاحب انطلاقات سريعه .. ولكم أن تعودوا لهدفه في الهلال في كأس فيصل .. كان بين الحارس والمدافع .. وقبل تجيه الكوره انطلق وتعدى المدافع وأخذ ( فوق تحت ) ورجع للكوره وسجل هدف

أدري ما أعرف أشرح .. بس شوفوا الهدف وتعرفون خخخخخ

ريـان بلال

المجرم .. أحس إنه مايتدرب زين !!

وإلا ليه دايم يبدع بالمباريات .. ولا يلعب أساسي !!

خالد

اشكرك

اقامه ممتعه في باكستان وعود حميد بأذن الله

يعجبك العالمي في كل مكان وزمان

كلام رائع وفي محله اجازة سعيدة وبالتوفيق لنصرنا الغالي