قصيدة خجـوله !

عندي قصـيدة توني قـلتها فيـك . . اقـــدر اسـميـهـا قــصـيدة خـجــولـه

مو من مقامك لكن وراس غاليك . . تسـوى الذي كـنت بسنيني اقـولـه

فـيهـا اوصـل لـك تـحـيـة محـبيـك . . دمـي ولحـمي والعـظـام النـحـوله

فـضـيلتـك يـا حضـرتـك يـامعـاليـك . . يالغـيـم يالقـطـر النـدي بـهـطـوله

يالشمس ياهمس المسا يالشبابيك . . يالعند ياطـيـش الصبا يالطـفـولـه

ودي ألـمـك واحــبــك مـا اخــليــك . . ليـن المسـا يعـلـن نهـاية حـلـولـه

ياغـاليـن باسـمـك ولا راح اسميك . . خلي المتابع ينحرق في فضـولـه

البـال عندك ، لا معـك ، لا حواليك . . ماتبعـدك عني القـلـوب العـذولـه

مجنون شعري يا ترى كيف اوريك . . ان الشـعـر يـمـك تحـول ميـولـه

حتى القـصـيدة اللي انا قلتـهـا فيـك . . من هيبتك صارت قصيدة خجوله