يا حزين الحظ...!!

يا حزين الحظ مقفي والسعادة من حصدها
دام قلبي يالسنافي مات حبه في يدينه

كان ودك تسمع القصة وتعرف من سردها
قرّب الدفتر وسجّل قصة الحب الدفينه

ذاهبه راحت ولابه شخص واحد قد فقدها
غير شخص ٍ في ثنايا جوف قلبه مستكينه

دارت الدنيا ودار الكون والدنيا بعدها
مثلما العقد المشوّه بعد ما كانت تزينه

وليلة العاشق بعد فرقى حبيبه ما رقدها
ذاق مر وذاق هم وزاد وقته بالغبينه

لملم الوقت البواقي من سواليف وجردها
في جدار الصمت يوم الصمت يشكي من ونينه

والمراسي والبواخر والسواحل في بلدها
تشتكي حر الفراق وتشتكي جور المدينه

والعواطف والمشاعر والأحاسيس اف كبدها
والمعاني والمواني تنتظر عود السفينه

والهقاوي والمناوي والغناوي من جددها
ان رفعت الصوت صاح القلب يشكي من ضنينه

والصواعق في عروض المزن لا صفّق رعدها
يمتطي صهوة جواد الحزن فارس من حنينه

يكتب ابياته على رمل الصحاري وان قصدها
هلّت العبره على ذاك المكان وساكنينه

رحت ادور فالمقابر والقبور أشفق لحدها
جيت عند القبر يوم النْعش قفوا شايلينه

الله اكبر كيف صار الدود يرعى في جسدها
بعد ما كانت تشيل الورد عنّابه وتينه

راحت اللي من حلاها ومن غلاها ومن شهدها
صاح قلبي من عذابه صاح فرقاها لعينه

راحت اللي في فوادي ساكنه بس لوحدها
ساكنه وسط المحاني وردة العمر وسنينه

راحت اللي كانت الدنيا وكانت من رغدها
تستحي منها الورود وتحتويها ياسمينه

راحت اللي عن مشاريه الغلا قلبي نشدها
كيف تسري في سكات وفي خضوع وفي سكينه

عشقها كثر النجوم وكثر ما قلبي هجدها
في ظلام الليل ساري والقمر بيني وبينه

ودمعة العين الحزينه فوق خدي يا نكدها
يا نكدها فوق خدي دمعة العين الحزينه

طالت الغيبة ولاني ذاكر سنين وعددها
دام قلبي لا تذكرها يضيع ابخفقتينه

سجّل ابياتي على وجه المعاني يا سندها
يا حزام الجنب فالشدات ربعي ذاخرينه

قالوا العرّاف من يسعى ورى الحاجة وجدها
قول كاذب و الحقايق ما تجمّل قايلينه