من الحب توبه ---حصريه---

بين صدق وعود ووعودٍ كذوبه=وبين طاري الحب والنفس الشقيه
عشت كني واحدٍ يعشق ذنوبه=ودون لا يعلم تبع سيه بسيه
لو يتاب من المحبه قلت توبه=ولا يعود اللي يتوب من الخطيه
ذاكرن لي قول من قبلي حكو به=وفيهم اللي من توفته المنيه
ولا طرا لي قولهم واللي بدو به=عدت قولٍ شدني ما اوحيت زيه
قال ابي بيتن تهيضت بعذوبه=يرحم الله طاري الوالد وحيه
(الهوا والنفس وابليس لعبوا به=لعبة اللي هاقي إن نفسه بريه)
الهوا واهل الهوا قد عرفو به=يخلف الرجال منه الفين نيه
ومن يطيع النفس روته العجوبه=تعسر الدنيا بعد كانت هنيه
وثالث الاشيا وغيري قد درو به=مطغي النفس القويمه والسويه
آآآه ليت الحب هذا منه توبه=والله إن اتوب ما اعود الخطيه
واترك دروب الهوا لو هي جذوبه=واتخير فالحروف الابجديه
واكتب بخطٍ عريضٍ ما يشوبه=لا غموض ولا شكوك ولا أذيه
الحبيبه لا غدت ريمٍ لعوبه=اخذها بشرع الله وسنة نبيه
وخل عنك الحب ووعودٍ كذوبه=وعيش عيشه مثل ما قالو هنيه.

وسلامتكم.....