هدية الاربعاء..

إنتحى ليلي وانا مثـل ميـاح القليـب

كلمـا صـدرت ذودٍ ورد للعـد ذود

الهجوس اللي تغيب النجوم ولاتغيـب

من سببها تسهر العين والعالـم رقـود

كلما حاولت أداويك يالجرح العطيـب

إفتكرت الطرقه اللي عساهـا ماتعـود

وإفتكرت الكلمه اللي غريبه من قريب

حربةٍ لو رغت عن دربها تنحر قعود

حطها بين الترايب ويبغاهـا تصيـب

وإحترمته وإجتنبت العنيف من الردود

ماوصله إلا الإشاره وهي تكفي اللبيب

لأجل مايدري بها شامتٍ وإلا حسـود

علم يحداني وعلمٍ على مثلي صعيـب

لابحده لليمين الغمـوس ولا الشهـود

والغريبه جات من واحدٍ ماهو غريب

لااقدر انساها ولااجزاه فيها بالصـدود

اثر بعض الهرج يترك جروحٍ ماتطيب

توي افهم قولة (الله ولا جرح الكبـود

علةٍ تبطي ونسيانهـا حـظ ونصيـب

لازم ابلعها واقول الصبر ماله حـدود

لا تقولوا كل جرحٍ يداويـه الطبيـب

بعض وصفاته تسمى مبيّحـة السـدود