قصيده رضا طارف الشمري بالأبل

رضا طارف الشمري

قال الذي فـي دفتـر القيـل ذاكـر
جنك بنـات الفكـر يالقلـب ناجـه

مثايـلٍ ماهـي تقالـيـد وصــور
من كهرب العسرات صيغت لحاجـه

ولا هيضن حب الغنادير يـا عمـر
عنهن خلوج القلـب هـون خلاجـه

اسباب ما حرك علي هاجـسٍ ضـر
اثر على جسـمٍ بـه الـروح لاجـه

شفنا بهـا الدنيـا غيـارات وعبـر
سفن الصحاري نزل الوقـت تاجـه

تلـوج بشبـوك المهونـه وتقـهـر
وتزعج حنين والطنـا فـي حجاجـه

وبعيونهـا لعيـون مـولاه تنـظـر
وتطلب من الرب الكريـم انفراجـه

ومن الطنا عبـرات صـدره تكسـر
تلوج وسط الشبـك مثـل الدجاجـه

تبكي على وقتٍ مضالـه مـع البـر
ترعي ويرعونـه سبـاع الزراجـه

بـدوٍ علىقفـر المراعـي تـغـاور
ماجيب له من كل صنـفٍ خواجـه

واليـوم كـلٍ مـن حلالـه تخسـر
لو يجلبه ما احـدٍ بجيـه الحراجـه

يا حيف يا عز العرب زينـة الـدر
متروكةٍ لـو كـان تركـه سماجـه

من عقب ما نرعـاه بالبـرد والحـر
وكـلٍ يزيـن للرحـول الحـداجـه

اليوم بعـض النـاس عنهـا توخـر
ما دري ردى والا صحيحٍ احتجاجـه

البـل هلـه راحـوا ووقتـه تغيـر
اللي هفا واللـي طبـع فيـه ساجـه

واللي ثنـى عنـده وحيـدٍ تدهـور
وجماعته كـلٍ بلـش فـي نعاجـه

يامـا غـزو يمـه بقـومٍ تجـاكـر
يوم الزمان اللي يخيـف ارتجاجـه

فوق الركاب اللي له القـاع تهجـر
يتلـن عقيـد ديـرة الـوم بـاجـه

عقب المسير اللي به الهجـن تفتـر
الخيـل حفيـه والمساميـر ساجـه

خـذوا سبـور القـوم قدامهـم فـر
وشافوا هل البل يوم وصلوا مداجـه

وجابوا خير طـرشٍ عزيـب تذيـر
الخيـل دونـه بالمناعيـر راجــه

وقـال العقيـد الابتـه يـوم عمـر
غيروا على البل والسعـد بالمواجـه

وتواجهوا عنـده علـى قـرحٍ غـر
مثل الجمال اللي علـى اول هياجـه

وكلٍ على حـوض المنايـا تحضـر
اسباع تحد ضروسها يـوم ضاجـه

وردن وقفـن بالمناعـيـر صــدر
وغدى لهـم عنـد التوالـي لجاجـه

ونار الحرايـب ولعوهـا المصطـر
واللـي دنـا يومـه منايـاه راجـه

وكلٍ شرب له من رايب الدم له كـر
كم فارسٍ روحه على الموت عاجـه

وصار الفخر لاهل الفخر ساعة الشر
وبنت الردي محـدٍ يجيـه لزواجـه

ياتي ولدها تبـع لـو ماكـره حـر
ماينطـح الشـدات عقلـه زجاجـه

وذكرٍ ذكرته يا فتـى الجـود يخبـر
والمـا قراحـه بيـن مـن هماجـه

واليوم شفنا قاصـر البـوع يزمـر
اللي من اول يعطـي النـاس باجـه

ان قلت له وشلون كيفـك اليـا مـر
يقـول لـك كيفـي تغيـر مزاجـه

ويطول شرحه لـو تطرقـت لنمـر
ما احصي ثمن تاريخ طي وخفاجـه

يا الله بنوٍ يبعـث القـاع مـن غـر
برقـه يشـوق مخيلـه بالتعـاجـه

بامر الولي ينشـى ومزونـه تزبـر
ويسقي رياضٍ تشتكي مـن عجاجـه

حتى خشـاش القـاع فيهـا تدهـور
ارضٍ مريضه والمطر هو علاجـه

عمارهـا نــوٍ مـزونـه تفـجـر
يملا الفياض وما هبـط فيـه باجـه

وديارنـا مـن خيـر ربـي تعطـر
يزهى نواويـر البختـري بفجاجـه

وتمت بذكر اللي لـه العيـد يذكـر
فردٍ صمـد مالـه شريـكٍ بحاجـه

سامع دبيب النمـل بالليـل الاسمـر
ربٍ تولـع سرجنـا مـن سراجـه

ختم الكـلام ازكـى صـلاةٍ تكـرر
على شفيـع الخلـق يـوم المواجـه



---------------------------------------------------

وسلامتكم