أمانة لا تودعني

يغصبني الشوق يم رضاك واطيعه
مع انك اللي تواصلني وتقطعني

اذيع حبي ولو ماودي اذيعه
الود ود الهوى والقلب يدفعني


بايعتك لحكم قلبي حزة البيعه
كم انتظرتك على قلبك تبايعني

وش بك تكابر على الخفاق وتريعه ؟؟
رُبَّ خفوق يقول لصاحبه دعني

الجوع كافر وقلبي زدت تجويعه
حبك متى هو بيِـــسلم يامجوعني؟؟

اهواك من كانوا يسمونك ادميعه
واذكرك للحين وطيوفك اتَّابعني

جسمك.. ورسمك..ملامحه وتقاطيعه
وبسماتك اللي على ذنبي تطمعني

وقصيدي اللي بك استنهض مطاليعه
اسمِّــعك منه وانت اللي تقاطعني

وتقول وش تعني الغض وتفاريعه ؟؟
وابسألك طلعة الرمان وش تعني؟؟

ذكراك تشفي معاليقي من الليعه
واحيان لاوالله ان ذكراك توجعني

صون الهوى واكرمه وارجع مرابيعه
مافيه عذر على غيبتك يقنعني

تعال قلبي تروع هد ترويعه
ابنثر شوق وانت اللي تجمعني

سنين عمري مع شهوره واسابيعه
تفداك لا...لا تضيعها وتضيعني

ان رحت ابضيع والضيعه هي الضيعه
وبتعود لو شفتني من شفتك! يعني

لا حدك الوقت تتركني فلا اتطيعه
وان كان طعته.....امانه لاتودعني !