اسئله حساسه...

ليه المسا عوق الشقاوي وطبه؟=وليه الهبوب تصحي القلب لا بات
وليه القمر يدعي جريح المحبه؟=ويقول له ياهيه ما فات ما مات
جرحك ظهر لو قلت للوجه خبه=وللحزن في ظحكك رسوم وعلامات
وليه المطر بالذات ريحه وصبه؟=كنه رسولن بين الاحباب بالذات
اشتاق فيه لشوفتك واتنبه=للي نسيته من مواقف ونظرات
لا استانس الخافق ذكر من يحبه=ورجع ياراجع فالوناسات ما فات
يامرتع القلب الحزين ومربه=يزين بك مثل الذهب صدر الابيات
هيهات ينسى القلب شخصٍ لعب به=وهيهات يدله خاطري منك هيهات
سبك مديح ومدح غيرك مسبه=تقول واذني صوتها تقول لك هات
ونبع الغلا عندك وعندي مصبه=ومن الوله في خافقي لك ولايات
طيفك حطب عيني وعيني مشبًه=والشوق بردٍ ما انقطع لو للحظات
ومكانك الصدر ولك القلب شبه=بين الضلوع اللي فردها التنهات
ولك بيرقٍ في القلب حبك يهبه=شامخ ولا هزه من العذل غارات
محبتك فالوقت ذا ما تشبه=إلا بخيمة بدو بين العمارات
ان شفتني ضايق واهوجس واسبّه=اخاف غدر الوقت والوقت دورات
لا تحسب إن دمعي نزل دون سبه=ابكي من الفرقا وهي ما بعد جات
اليوم كل امورنا مستتبه=وبكره ما ندري وش معه من مسرّات
أرب قلبك مثل قلبي اربه؟=ما يخلفه كثر العذل والمسافات

مما راق لي...