دام الفلوس تغازل الفردان وتعشق الوليد.....

الناس منجرفه مع الاسهم وكم زاد الرصيد=هذا يصفيها وذاك يبيعها ويردها
وانا على رجواي لاني مستفيد ولا مفيد=مدري متى علمي بجوّاد الفلوس وعدها
لكن على ما قال ابو صالح حمد صالح سنيد=الله يلعن حاجة الدنيا ويلعن جدها
الحاجه اللي من ورا حبة خشم شخصٍ بليد=ما ارضا بها والناس ما ترضى ولا هو قدها
صحيح ما عندي رصيد فلوس لكن الاكيد=ما عاد عندي كون عز النفس ليه اهدها
انا عزيز النفس وازيدك بعد راسي عنيد=يبشر رفيقي بالسعد وعداي تمسك حدها
ما ارافق الرجال متمصلح لجل ماله يزيد=وعيني قسم بالله في مخبا الرجل ما الدها
ارافقه لا صار راسه طيّب وشبحه بعيد=ويمناه تعطي ما درت يسراه وش هو مدها
واليا حكيته سر ما كنه سمع شيٍ جديد=يعني خلاص السر في نفس بعيدٍ سدها
هذا رفيقي وان حصل ولا فخلوني وحيد=خلوني امشي في هوا نفسي واحقق ودها
لبيك يا ملهم فكر راسي على بدع القصيد=ياللي على شانك بيوت الشعر تاصل حدها
في ذمتي ذمه لو انحت لك على وجه الجليد=بيتين يا وجه الجليد يذوب قبل اعدها
ويمكن لو اكتب لك بعد بيتين باطراف الحديد=يصبح حرير وهو تموت النار عاده ندها
الله حسيبك كيف صرت اسمح وانا باسي شديد=اصبحت اسامح زلتك واقول هذي عدها
عذرك ينسيني خطاك الامس يالدر الفريد=عذرٍ لو تداوي به جروح المريض يبدها
دامك تعز الوصل ومقدّى على الراي السديد=لا جبّعت بقعا حبال الوصل قمت تشدّها
الله عطاك الزين والعفه وعادك سيد غيد=والله صخرني لك محبه وانت منت بضدها
اسمّعك بيتين وانت تقول بالله عيد عيد=واعيدها واعيدها واعيدها واردها
كلها على شانك قسم بالله ما هو لحية نشيد=يسقى على ذيك الليالي قبل تفهق يدها
يوم الليالي كنّها من بيننا ساعي بريد=كنها تعلمنا وش اللي بيحصل في غدّها
واليوم لا ساعي بريد يفيد ولا يستفيد=كلٍ يبي يقطع علاقة ودنا ويبدها
لكن فمان الله واشوفك ضحى العيد السعيد=عشان احصل لي عذر وعداي تمسك حدها
تدرون وش خلا هل الطوله تحت رحمة عبيد=لان الليالي مع هل الطولات تقصر مدها
دام الفلوس تغازل الفردان وتعشق الوليد=الله يلعن حاجة الدنيا ويلعن جدها...

مما راق لي...