الضيقه....!

الضيقه اللي شرها يقعد ايام=وتكثر على قلب المعنا سهومه
لامرت اللي يعشق الصيد قدام=حزة عشا طيره تزود همومه
وقت المقيض وبه هل الطير صيّام=وطرا لقلبه زين طيره وحومه
ولا مرت اللي مثل الحين ما رام=كثرت تعاليق القلوب الهيومه
يصير من ربعه ونفسه عكس لام=ويمل حتى من عيال العمومه
ويمل من كثر العرب واول الزام=ويضيق لامنه ذكر طول يومه
ويصاحبه مع الزمن كثر الاوهام=ومن ضيقته ماعاد يقضي لزومه
ويخاف لا تنقد خواله والاعمام=اذا اجبره وقته يخالف سلومه
هذي هي اللي شرها يقعد ايام=وتزود مع هموم قلبي سهومه
الضيقه اللي كل من حسها صام=من شوفة العالم وسجو علومه
ولا لنا غير الدعا كلما حام=الضيق في صدري وكبرت ردومه
يالله تحفظنا من كثار الاوهام=ويالله جارك لا نطيع الظلومه...