ريف عيني...

وجودي على اللي ودي القاه وجد الطير=على الصيده اللي رده الكسر ما جاها
كسير الجناح وهي تعلّت ما فاد السير=وراحت عليه الصيده اللي تمناها
وانا مثل ذاك الطير بالحال والتصوير=على الصاحب اللي ريف عيني ومشقاها
تركني حزين ومالي الوقت بالتفكير=وعيني لشوفه غارق الخد من ماها
تفارقت انا وياه والوقت قرب عصير=وكبدي حزينه صادق الضيق غشاها
انا ليتني وياه مثل الرشا والبير=على بعد قاع البير تاصل له رشاها
هذي امنياتي يا عسى فامنياتي خير=ويرد الوصل ويداوي العين من داها
عليه اتوجد في ملاقاه وجد الطير =بعد طارت الصيده وهو كان يبغاها
كسير الجناح وهي تعلت ما فاد السير=وراحت عليه الصيده اللي تمناها
احث المسير ومشغل الراس بالتفكير=عسى اودية وصله يعوّد لها ماها