هدية الاربعاء...

هيه ياللي غرك الليل واغراك النديم=هيه ياللي هزك الشوق والمسرى ضياع
وقفي بين الخطا والسراط المستقيم=والعبي بين التراحيب وكفوف الوداع
وسولفي مثل المشاريه في صوت الحشيم=واسكتي مثل الشفايف الا طاح القناع
واضحكي مثل النواوير في روضة خريم=واغرقي مثل المزاجات في غرب الرفاع
وابعدي مثل المتاهات في حلم اليتيم=واقربي بين السوالف وكتفي والذراع
وانظري لي نظرة الشوق للشي القديم=واغرقي بالدمع الازرق مظاليلٍ وساع
واصبري مثل المسافات في صبر الحليم=واسمعي صوت الهوا يوم فليت الشراع
يوم صرتي عود ريحان ورضاي النسيم=اصبري يانجمة الصبح مال الصبح داع
قد طلبت الله وانا بين زمزم والحطيم=شوفت يااغلى ثنية الا صرتي رباع
العيون تجوع لك جوع والله العظيم=والعشا في عيونك السود وعيوني جياع
ان عطيتي مايرد الكريم الا اللئيم=وان بخلتي قلت تكفين والدنيا متاع
اقبلي مثل التباشير في وجه الكريم=وارحلي مثل التعازي على موت الشجاع

مما راق لي...