البارحة .....

البارحه يوم المخاااليق نوام .... وانا اتقلب والكرى ماهناني


غمضت عيني لاجل اشوفك بالاحلام .... خابرك داايم في المنام تغشاني


وأخذت ساعه بين غفوة وسلهام .... لاطيفكم جاني ولا النوم جاني


وشلون انام .. وهاجس القلب مانام .... على السهر شوقي علاك احتداني


سريت اقلب في الدفاتر والاقلام .... وادورك بين الشعر والاغاني


مشيتني .. مع الهواجيس قدام .... وعرضتني .. شرهات قاصي وداني


أبعد علي من الاماني والاوهام .... وانت الغرام اللي تخلل كياني


اشوف نجم سهيل يبدي على الشام .... وسهيل نجمن في مداره يماني


ياليتني بين الكواكب والاجرام.... واشوف جدة والبحر من مكاني


صرت أبعد من النجم ياحلو الانسام .... وانت القريب اللي غلاه احتواني


ليتك تجي والا تقربك الايام .... الشوق من بعدك تراه ابتلاني


يامن حكمني بالبراءه والاعدام .... في سجن نظرات البراءه مداني


انا دخيلك لاتهور بالاحكام .... وانته تشوف ان الزمن قلباني


كانك نسيت العام واللي ورى العام .... انا تراني .. مانسيتك ثواني



اعجبتني هذه القصيده اتمنى تعجبكم ،،،،،،،،،،،،،