تصبح جروح الوقت !!!!!

المشكله لا شفت شي ٍ تمناه

عينك تشوفه بس ماتقدر تجيه

تفرح به عيونك لشوفه ولقياه

وقلبك يبي قربه وفكرك يناجيه

تحّول من دونه مقادير مولاه

تمنعك من قربه ولو صرت تغليه

كم مرةٍ فالوقت حاولت تنساه

ينساه غيرك وأنت لا مانت ناسيه

مثل اليتيم اللي فقد عَود يرعاه

يسمع صدى صوته ويسمع طواريه

وتهل عينه دمع والجرح يغشاه

كنه طريحٍ ينطر الموت ياتيه

يحن قلبه والمعاليق تضماه

والدمع فوق الخد بانت مواريه

وألا مثل من ضاق من جور دنياه

أمه توفت عقب ماهي تناديه

وتصحح أغلاطه وتدمح خطاياه

وترخص له الغالي وبالروح تفديه

ثم لا تذكرها وبانت خفاياه

تصبح جروح الوقت مرسومةٍ فيه

يفتح كتابٍ فات ويعيد ذكراه

ويقلب أوجاعٍ قديمه تبكيه

يشوف صورتها وتضحك شفاياه

وقلبه من الفرقا يشده ويثنيه

وده يجيها والمقادير تنهاه

لكن ويش اللي بيده يسويه

الموت حق وكلنا تحت مبناه

أحسب حسابه وأعرف أنك ملاقيه

في ساعةٍ يبدي على القلب مبداه

وينهي نهاياته وروحك بياديه

يالموت لك هيبه وسلطه تقفاه

ولك وقت ماندري متى نلتقي فيه

عزي لمن فالوقت مايحسب إخطاه

اللي غفل قلبه وكثـَرت معاصيه

ماكل ما تطلب تبي شي تلقاه

أطلب رضا الله قبل موتك تلاقيه

مماراق لي ....