هدية الاربعاء...

لو ان عندي مثل ما عند الوليد ابن طلال=شريت برج الفيصليه لجل اغيض المملكه
ماهو على شان الجنيه ولا على شان الريال=لكن على بالي طرى شيٍ تمنيت ادركه
غروٍ غريرٍ غرره زينه ومطغيه الدلال=لا شاف له شيٍ يبيه فظره لحظه يملكه
اللي سواته وبسهوله يملك قلوب الرجال=اليا لمح له درب في قلب الرياجيل سلكه
هذا وانا ما شفت منه إلا التمنع بالوصال=كفّي من الحسرات لا مني تذكرت افركه
يحبني وادري بحبه مير ما جالي مجال=اجلس معه جلسه وهذا الوقت ما فيه بركه
يطري علي مع السهر واخذ ثلاث اربع ليال=تقول كن العين ظبي وحضرة الليل شركه
صوته ليا جاني ظما يسقيني المي الزلال=وساعة غيابه تدخل عيوني ونومي معركه
شفايفه جمره وانا شاعر سريع الاشتعال=الله اشغلني به وغيري ما اشغله إلاكبكه
لبا عيونه والشعر لا حط شال وشال شال=إن طوّله وان قصّره وان سعّوده وان امركه
اليا قفل جواله اظلم كل ما حولي ومال=فكري لتيار العذاب وكل طاروق امسكه
واصبحت اهوجس ما تقول الا الوليد ابن طلال=مع اني افقر شخص عايش في حدود المملكه..

مما راق لي...