يانصر كم عانيت هم وشقا ضيق ؛

سلام الله عليكم ورحمته وبركاته

حديث القلب ودقاته يسوقه غصب لو بخفيه
يسوقه شعري ببياته وعلى ربع الوفا يحكيه

ّّّّّّّّ

يانصر كم عانيت هم وشقا ضيق
الضيق في صدرك غدى هو ضلاله
يضيق مادام المناصب تلافيق
ولا السلاله نفس ذيك السلاله
بقولها والله شهيد المخاليق
في ذمتي حال النصر ماهي حاله
مرت عليه سنين يابس به الريق
من مات رمزة مات معنى الاصاله
مات اللي حبه راسخ بالمعاليق
اللي عشق نصره لحد الثماله
صيت النصروقته تزلزل له طويق
واليوم شفت الفتح ند لنزاله
حتى افقر صغار النوادي الشرانيق
صارت تعد النصر (رشفة بياله)
ماعاد له هيبه ولاحساب وتدقيق
ويبشر بخير الخصم اذا جا قباله
واضحى الكيان وداخله شد وتمزيق
وآخر مصيبه جت من اصغر عياله
فضل عليه يصير بين الزواعيق
ساقط لقا لاقط خشاش الفضاله
ناطح ونابح كل وجهه مساحيق
ناكر ورداد الجميل بنذاله
واعضا ترف هم بالمنصات تصفيق
بشت وترزز وذاك يضحك عقاله
فيهم طنخ لكن كما طير بطريق
ريشه وجناحه ماشفعله وشاله
وقبيلهم من جاب راس الغرانيق
ورزه على الاشراف ووسع مجاله
وقام يتقضى يشتري بيع وتنسيق
حتى العماله صار فيها بطاله
وعوود على ماركات دوخي وصديق
ورجيع نوع اللي بناديه عاله
واقرب مصاب ولو هو من الطواريق
هاته وابوة وهات عمه وخاله
لكني بنشد (ولد تركي) عسى يفيق
من قبل يضن ان نصرنا من حلاله
ماجد ويوسف والهريفي وتوفيق
وشلون تقفي هالرموز إستحاله
لاشك فيه اسباب ويلزمك تحقيق
ويلزم تحل المعضله وبعجاله
نبغى الجواب وثبته بالمواثيق
ولياك تامن من هبايب شماله
خوفي على حال النصر مع مطافيق
من (عالمي) آسيا لنادي بصاله
هذا اختصار الوضع ومن غير تلفيق
واللي فهم مغزاه يرفع عقاله

وسلامتكم

دمتم بود/ ابن فـــايز الع,ــــالمي