ولا غابت الشمس محدن دور سراجه*نور القحاطين ساطع في جبل شمّـر

الشمس غابت وكل ٍ دوّر سراجه=والشوق جمّر محرّ الشوق لاجمّر
دام اتجاهك شمال مودعك حاجه=سلّم على حايل وسلّم على شمّر
قدامك الخافق اللي ينشد علاجه=كنه معلّق على برزان ومسمّر
وانت تعرف يا بعد حيي من تواجه=-بيضان الافعال لامن الزمن سمّر
ان ضاقوا أعنف من البحر وامواجه=وان راقو اركد من الخرمان لا عمّر
كم صيت بيت ٍ عتق في الباب مزالجه=وكم شيخ اماره قبل تعيينه مومر
وكم حاتمي ٍ تكفيّ فلّة احجاجه=وش لون للضيف لو عن ساعده شمّر ؟
وان مر تاريخهم متلبس ٍ تاجه=كم عاشق ٍ كيّف وكم حاسد ٍ زمّر
في جو ٍ اغلى على الرجلي الى داجه=من ديرة السادس ومن ديرة معمّر
كنّه الا اهدى له البراق فجاجه=خلت غرير ٍ ضحك ومن الخجل حمّر
توارثو حرثه وتمتير ديباجه=ركابة الجيب من ركابة الضمّر
الودّ لا غرس بدري صعب مخراجه=والله ولا الذّ واحلى منه لا ثمّر
ادخل على اللي تطوف البيت حجاجه=من ناقص ٍ عند مدح الغير يتذمّر
والمدح لو كان في الرديان للصاجه=ويقال عمّر بلد بالعون ما عمّر
والذّم لو زاد في الطيب تولاجه=لا احرق ولا اغرق ولا عمّر ولا دمّر
ماني بمتحسف بشعري على حاجه=الا اني اروح ما غنيت في شمّر

هذي قصيدة شاعر الاندلس ناصر القحطاني ورد عليه الشاعر احمد الجريفاني الشمري

هلا بشهمٍ صدق في رسـم منهاجـه=هلا بمنهو تمثّل فـي جبـل شمّـر

هلا بمن تعجـز القيفـان لحراجـه=ومن حقه إنه على القيفـان يتأمّـر

وصل سلامك ولا يحتـاج ديباجـه=عمّرت صرح الغلا ياعلّـك تعمّـر

نظمت عذرا تهبّـل فـي تغنّاجـه=لو حاول احدن يجاري حسنها قصّر

يامير الاشعار يامن يحسـده تاجـه=اعذر محاكيك بالقيفـان لـو كـرّر

لو يمرض الجود نادوا فيك لعلاجـه=تعطى البشاره لمن في جيتك بشّـر

لو يظلم الكون نورك يجلب افراجـه=ماعاشرك في حياتك حـي ويكـدّر

يشهد لك ا لليل لامن ضوت ابراجه=ويشهد لك الحبر والاقـلام والدفتّـر

والطيب يشهد لك انك صرت هداجه=نعم المراجل ونعم الاصل والمخبـر

قحطان كنه محيـطٍ تلطـم امواجـه=طوفان عارم ليامن الهـوى زمجـر

ولامن هدا الموج يهدي غالي انتاجه=الدر واللـول والمرجـان والعنبـر

ما رامهم طامع إلا يرجـع ادراجـه=الليث ماينقرب خـصٍ ليـا كشّـر

نبراس عزٍ يسـرك فـي توهّاجـه=من خلقت الكون حتى ساعة المحشر

يامن نظمت البيوت وقمت بخراجـه=عسى حياتك سهود ولايجيك الشّـر

منت الذي يحسب بيوته على حاجه=حنّا هلك والجبل في مثلكـم يفخـر

ولا غابت الشمس محدن دور سراجه=نور القحاطين ساطع في جبل شمّـر