...‘‘‘ محدٍ تجي دنياه دايم على الكيـف ...‘‘‘

محدٍ تجي دنياه دايم على الكيـف .
. يومٍ محل واليوم الآخـر مريفـة

لاتلتفت تكثر عليك التحاسيـف .
. مافات منها فـات خلـه بكيفـه


ترقى بصيتك فوق روس المشاريف .
. وتمشي معك مثل الهبوب اللطيفة


اليا اقبلت لمت شتات المواليـف .
. واليا ابعدت ينسى وليف(ن) وليفه


مادام أنا ويـاك دايـم ملاهيـف .
. ومتقاسميـن حبنـا بالنصيـفـة


أنا خويٍ للسهر والسهر ضيـف .
. ومن عادتي لاحل ضيف استضيفه


حبك نزل بين الضلوع المهاديـف .
. الصدق بيّـن والنوايـا شريفـة


مع غيرك أنتِ ماتطيب السواليف .
. يااللي على قلبي مزوحك خفيفـة


قصة غلاك تشرّف العشق تشريف .
. سيرة غلا بين القلـوب النظيفـة


أنتِ اليا وصفّت فوق التواصيف .
. يااللي لزينك كل زينـة وصيفـه


وان قيل به للزين والحسن تعريف .
. أنتِ عن أجمل مايوصّـف منيفـه


مامرني زينك ولا بالنظـر شيـف .
. الزين في غيـرك مغطيـة زيفـه


الناس تفرح بالمرابـع وبالريـف .
. وقربك لقلبي هو ربيعـه وريفـه