ماعرفتك !! والعذر اقبح من ذنـوب الخطيّـه ..

ماعرفتك !! والعذر اقبح من ذنـوب الخطيّـه
حتى شكلك صدقيني ان قلت لك : بعضه نسيته


اذكر اعيونك حورها من الخجل زايـد شويّـه
بس هذا اذكره وغيـره مـن الذكـرى محيتـه


لابعد اذكر .. شعرك اللي يحـب لعبـة يديّـه
سالفه شعـرك لحالـه لـو ابشـرح ماوفيتـه


واذكر ان فمك حضن جمرن ٍ حمر فوق ابرديّه
لابتسم لي رحت له كلي مـن اللهفـه وجيتـه


واذكر ان غمازة اخـدودك عـذاب ومهمهيّـه
وردتني لطريـق اللـي ابتـدى يـوم انتهيتـه


واذكر ان اطعونك اللي بالظهر كانـت قويّـه
ايه اعرفك بس اخاف الجرح يكبر لا طريتـه


انتي كنتي شي ثاني .. كنتي شي منـي وفيّـه
اقرب انسانه لقلبي حطمـت قلبـي فـي بيتـه


تذكرين .. الورد الاحمر يوم جبتي لي هديّـه
قلتي : تكفا لايموت الورد لك غالـي شريتـه


مات قلبي قبل يموت الـورد وجروحـه نديّـه
في يديني جبـت دم القلـب للـورد وسقيتـه


كنت احسب اني اضحي .. مادريت اني ضحيّه
كنت احسب ان العطى يثمر بعين اللي عطيتـه


راحت احلام العمر .. روحه كذا من غير جيّه
حتى زرعي اللي زرعته .. ماتوفقت وجنيتـه


من عقب ماكان ليّه .. صار لـه ماهـو بليّـه
من خذاه !! وقلبي يسئل عنـه لكـن مالقيتـه


دايم اسمع عن خوي ٍ خان فـي خـوة خويّـه
موقف ٍ يمكـن كتبتـه بالشعـر قبـل وقريتـه


المهم .. ماكنت احسـه ليـن ماجتنـي بليّـه
من يديك وحسستني وخاب كـل اللـي هقيتـه


يابدويّـه مـو كـذا رد الجمـايـل يابـدويّـه
البـداوه علمتنـي كيـف ارد اللـي خذيـتـه


في الزمن هذا .. محال الوافي يلقى له وفيّـه
الزمـن هـذا خذلنـي فـي محبتـك وبكيتـه


كنت اقول : الطيّبه احسن من علـوم الرديّـه
كنت اقول وكنت اقـول ولانفعنـي ماحكيتـه


مابقا عنـدي كـلام ولا بقـا بصـدري بقيّـه
مـن تفارقنـا بصـدري هالعتـاب ولاشكيتـه


هذا كله اللي عليك .. وقولـي انتـي ماعليّـه
بسمعك للصبح يمكـن منـك اسمـع مابغيتـه


اما شكلك اعرفه عـرف الموصـى للوصيّـه
قلت : ماعرفه .. وفي قلبي اقول:انـي فديتـه


ايه اعرفك والعذر اقبح مـن ذنـوب الخطيّـه
انتي شكلك صدقينـي راح امـوت ولانسيتـه !!