ليش تقولون بيفوز النصر ؟!

خسر النصر الاياب كما خسر الذهاب بالثلاثة

واستحق الاهلي الفوز مرتين وبجدارة وابارك لهم التأهل

وبصراحة مدري وش اقول

من وين ابدا كلامي! وعن ايش اتكلم؟

وش بقى في النصر ماحكينا عنة؟
ما اقول غير ي ليتني مارحت الملعب ليتني نمت ولا وقتها عندي دوام وماقدرت
والله مو عشان خسرنا من الاهلي (رايح جاي) بالثلاثة

لكن بسبب نظرة مٌحبطة ومشاعر متصادمة ودمعة بريئة
اعتلت وجه محمد ولد اخوي طفل عمرة 8سنوات عاشق للنصر,,
اصر انة يحضر معاي انا واثنين من العيال للملعب وليتنا ماحضرنا ولا اخذناة معنا

مشينا مع اني خايف وايدي على قلبي لكن
كنا متفائليييين واذكر ان خويي سأل محمد,,
هاه حمود من بيفوز النصر ولا الاهلي ؟ هز محمد كتوفة يعني مدري !

التفت خوينا وقال بصوت عاااالي افاااااا وانا ابوعلي

وقام يمدح النصر ويمجدة ويقول لمحمد بتشوف بنفوز على الاهلي وبنأخذ الكأس بعد وانا من باب الحماس قلت اية ي محمد هذا النصر مو اي نادي !

وفي الملعب بداية المباراة محمد معانا قووة حماااس وتشجيع وسجل السهلاوي الهدف وخميت محمد من قلب وشلته على كتفي واول ماقعدنا جاء فاول للأهلي,, والله عرفت انه قوول وقلتهاا للعيال وفعلآ سجل برونو..

لكن مازال جمهور النصر عنده امل وممكن نسجل هدفين ونرجع للمباراة من جديد كالعادة متفائلين,
وابوعلي يقول لمحمد ماعليك اللحين تشوف العالمي وش بيسوي فايزيين فايزيين ان شاءالله

بدا الشوط الثاني
وسجل الأهلي الهدف الثاني لحظة صمت خيمت على مدرج النصر ومحمد يلتفت لي بوجه شاحب ودموعة بعيونة والجماهير من حولنا بدأت تشتم وتلعن وانا عيني على محمد وهو يتلفت بصمت وبدهشة , مات الحماس فية فجاءة اختفت الابتسامة وبان الحزن في محيا طفل, ومع الهدف الثالث بدأت الجماهير بالخروج من الملعب. طبعآ الشتم والسب مسيطر على الاجواء, واكثر ماتردد على مسامعي (فريقنا فاشل)..

كل هذا يصير ومحمد مو فاهم شيي

قبل لاينفجر بالبكاء قال جملة قتلتني
قال ليش تقولون بيفوز النصر ؟!

وطاح بحضني صياااااح والله بغيت اصيح معة
والله العظيم ماضاق صدري على الخروج من المنافسة كثر ماضاقت بي الدنيا على الي شافة هالولد اليوم
مدري بيستمر بعشقة للنصر ولا بيمتنع عن التشجيع ولا بيقلب ( اهلاوي )

انا مالي دخل ابوه الي ازعجني خذوووه هذا لحاله اسد في المدرجات ههههههههههههههه اسد هاه شفناه الله يحفظة كان اسد في البداية وبس..

وحبيت اتكلم عن جمهورنا اذا حضر للملعب وخسر النصر للأسف بعضهم ينزل سب ولعن وشتائم يقشعر لها البدن,

ياخي لو على هجمة ضاعت بنقول معليش اعصاب مفلوتة وقتها وطلعت بعفوية بس بعد المباراة خلاص انتهى كل شي انتقد تكلم طلع الي بقلبك بس بعيد عن السب والشتم ..

انتهى الموسم ولن يفيد شي الآن انا برأي نصبر على فيصل بن تركي حتى انتهاء فترتة ثم يغادر بذلك يكون اخذ فرصتة كاملة .. ولة جزيل الشكر على ماقدمة للنصر

اتمنى ان يتقدم لرئاسة النصر صاحب السمو الملكي الامير محمد بن عبدالله بن عبدالعزيز آل سعود .. ايه ولده طال عمرة
كذا اضمن لكم رجعة النصر للبطولات وابشروا بالاجانب والفريق الذي لايقهر.
آسف على الاطالة ودمتم بخير..
بالتوفيق لنصرنا بالموسم القادم

اصبر يانصر وانصر ياصبر

نــصـــرنــا