أحمد الناصر الشايع مرثيه بعد وفاة ولده

السلام عليكم ورحمة الله وبركاته هذي قصيدة الشاعر أحمد الناصر الشايع مرثيه بعد وفاة ولده واليكم القصيده وهالله الله بالردود
والآن اليكم المرثيه:
أضحك مع العالم وكني علـى نـار
ما غير أهوجس بين نفسي وبينـي
يعلم بها العلام فـي كـل الأسـرار
تقل اتحـرى لـي علـوم تجينـي
مع الطروش اللي يجيبون الأخبـار
فهمت رأس العلـم مـن كلمتينـي
من يوم قالوا جا محمـد ونصـار
تكسّـرت عقبـه جرايـد يمينـي
عز الله اني عقب ما صـار صبّـار
من عقبهـا ونيـت لـي ونتينـي
ونة غريب بالخلا ضـاع واحتـار
لولا الله أبـرك ثـم قـوة يقينـي
لا طير مثل الطير من كف صقـار
تخنقنـي العبـره وأفـرّك يدينـي
واحترت مثل مصالي النار والغـار
علـم يخلـي كـل قاسـي يلينـي
كنه على قلبي رصـاص أم كـرار
الى ذكـرت عيالـه المصغرينـي
هــذا يعزيـهـم وهــذاك زوار
احد على جنبه واحـد لـه ونينـي
جتني هموم القلب من كل الأقطـار
قلت اصبروا والله مع الصابرينـي
الله يكافيكـم صواديـف الأشـرار
عسى عوضنـا الحـي بالميتينـي
ناصر ونايف ذخرا سـر واجهـار
وأحمد وعبدالله ذرانـا الحصينـي
صغار سن وان بدا الـلازم كبـار
يجبر عزاي اللي بخلقـه ضمينـي
محيي العروق الميته عقب الأمطار
مالي عن المكتوب فـوق الجبينـي
لو رحت شرق وغرب ويمين ويسار
صليت نصف الليل لـي ركعتينـي
أطلب له اللـي للخطيـات غفَّـار
خفف ذنوبه يا أرحـم الراحمينـي
في ماقفٍ ما ينفعن فيـه الأعـذار
جعله برضوانـك مـن الفايزينـي
بالماقف اللي به يضيعـن الافكـار
في ماقفٍ بـه كـل خافـي يبينـي
تمت وصلى الله على سيد الأبـرار