هذي عوايد نصرنا يرفع الراس

هذي عوايد نصرنا يرفع الراس
ليا بغى له شي لازم ينوله
في ساعة التتويج حنا هل الكاس
ليا قضت جوله بدينا بجوله
الفوز ماهو بالجرايد بقرطاس
يبغى عمل مخلص وفن ورجوله
الرمح الاسمر للملايين نبراس
يستاهل التصفيق لو صفقوا له
ليا وقف قلنا كتم كل الانفاس
وليا ركض كل الخصوم هتفوله
وليا اخترق يجلي عن القلب الاحساس
وليا ارتقى نجم العرب من يطوله
فيه الموينع داخل القول محتاس
ينخي دفاعة والدفاع فزعوله
تجمعوا تفرقوا صاروا أسداس
تكتلوا تبعثروا وافتحوله
تكاثروا تناقصوا مابهم ياس
تصددوا بالقاع واستسلموله
تليموا وبطونهم مثل الاقواس
حقٍ على الفارس يضمّر خيوله
مع السلامه مرهم تقل نسناس
رجله على قطع المسافه عجوله
كبودهم من زايد الركض يباس
صوت لهم بهجه لا بحروله
يحدهم والراس جابه من الفاس
عنده كلامٍ كل مره يقوله
تجمعو تعاتبو عقب الافلاس
كلن يقول انت السبب في دخوله
لاباس يامنصور لاباس لاباس
قبلك قليل الفود ضيع نعوله
هذي مهي شلة جبرتي وعباس
هذا عمل ماجد وهذي فعوله
مبطي تراه بروسكم تقل هوجاس
تصّفحوا تاريخكم وارجعوله
وان كان مرتكم برامج مع الناس
سووا مع العيسى لقا واشتكوله
قولوا ذبحنا واحدن ماله اجناس
متبينن شكله ورقمه وزوله
الجوهره زين بها عقد الالماس
والاصفر البراق نجم البطوله
يانصر أحبك حب من غير مقياس
حبٍ من أيام الفرح والطفوله
الشاعر فرحان قيران العنزي ـ عرعر