لهيب أنفاس.!

عبث قمت أزرع بطين الورق حرفٍ يواسيني
مداده غيمة شعورٍ جرح كفّينها غيابك

تعب رحت اجني أشواك السهر والدمع من عيني
وأدثّر طفلةٍ يطرق لهيب أنفاسها بابك

ومن اول زفرة أشواق القلم لآخر وله فيني
كتبتك حاجةٍ أكبر من انك روح واحيا بك

ورسمتك طفلٍ يشاغب جدايل ليل يكسيني
وينثرها على وجه السهر وتضمّها أهدابك

تعال انفخ بوصلك في جنين الروح واحييني
تلاقي بي جميع الناس تحيا بس باسبابك

ورتبني قصايد عشق واحساسك عناويني
أنا قبلك قصيدة بعثرتها الريح بكتابك

ولملمني بليلة صمت نخب البوح واسقيني
بـ كاس يرفرف بقلبي أغيب وأرجع اصحى بك

أبي تعزف على ناي المطر شوقك وغنّيني
نشيده للوطن ..للصبح ..للوحده بمحرابك

أنا بعدك ثلاث اشياء ترعبني وتبكيني
مطر جده..غيابك .. حلم جابك لي ولا جابك

كثير احتاجك بليله تذرّ الملح في عيني
وأنا ودي أنام ولا أبي إلا على أطيابك

تعال استغفل عيون الحزن واخطفني بيديني
أبي تقتص لي من جوع حرماني بعنّابك

عبث أرسم على صدر الورق قلبٍ يواسيني
مداده غيمة جنونٍ تعافت من عنا غيابك..!



للـ مبدعه والشاعره العذبه // مريم الزعبي


ودي