صوت الصورة :أنا اشهد إن التعب حدّك خلاك وسط الخطر ترتاح

صوت الصورة

صورة العدد

إعداد - بكر هذال

أنا اشهد إن التعب حدّك

خلاك وسط الخطر ترتاح

حوّل عن الشر من ردّك

البيت كلّه معك يا صاح

يا معلّم الشغل من قدّك

شطّب وسلّم لنا المفتاح

عثمان الرشيد - الرياض

نام المليس فوق سطحٍ وكرنيش

خايف من الحمله وتصحيح وضعه

كم واحدٍ يبحث ومثله عن العيش

تحتك صقاله قطعه اليوم قطعه

ليتك تحت متوسد الرمل والخيش

ترى الجدار اليوم يحتاج لمعه

عبدالمحسن المحيسن - رياض الخبراء

من شاف عامل بعز الشغل مرتاحي

ومقيّلٍ في محل الشغل .. والعدّه

وعلى الطرف نايمٍ ما خاف لو طاحي

الله يستر على أهل الشغل والكدّه

أكيد من شعب عزيزٍ .. ومزّاحي

شعبٍ أصيلٍ شقيق .. وكلنا نودّه

عبدالعزيز الصالح - حايل

تكفون ياللي ترحمون المساكين

تفطنوا ياهل القلوب الرحيمه

اللي تعرفون العدل والموازين

وضع العماله عاقبتها وخيمه

أعدادهم يا ناس خطى الملايين

كم سببوا فوضى وأيضا جريمه

حمد عبدالله الوايلي - حوطة سدير

صيانتك للدار أمرٍ سليم

إن كان فنطر أو تشقق من أخطار

والدار بعد الوقت تحتاج تقييم

إصلاح ما يلزم قبل يحدث أضرار

وعامل على الحافه لديه التعاليم

ويتابع الإصلاح والله ستار

سعود عائش الحربي – القاهرة

يا نايمٍ بالشمس وسط النهار

على برنده ما لها ستره أو شبك

خطرٍ عليك تطيح لو صار ما صار

فك الصقاله كان شغلتك ما أعجبك

عبدالله علي الحوشاني - الرياض

عقب التعب طاب له مقيال

على المظلّه يبي يرتاح

ما هي غريبه على العمّال

أمّا أنجز الشّغل ولاّ راح

عبدالكريم عبدالرحمن السلوم - القرائن

زود التعب يا صاحبي هد حيلك

خلاك نايم فوق سطح العماره

البرد قارص أنتبه لا يجيلك

ومن قبل نومك إنتبه للحراره

خالد ناصر المخيمير – روضة سدير

على ارتداد بسترةٍ يبني العامل

بلكٍ يبي يقوّمه ملحق على الصاله

يا صاحب البيت كانك للبني صامل

زد العماله وخلّه يرفع الصقاله

اخلص ورمّّم ترى جيرانك تجامل

من الطقطقة ما هناه النوم وعياله

سعود عبدالعزيز الهزاع - نعام