محاوره شعريه بين. كارينيو. وسامي

محاورة بين كارينيو وسامي

كارينيو
سلام الله على نفسي ونادي النصر والجمهور
سلام مايليق الا على كحيلان واحبابه

انا ادري من صدارتنا كثير ٍبايت ٍ مقهور
يموت الصقر جوع اليا كسر شاريه مخلابه

سامي
سلام الله على الروقي مع الهدلق مع الناقور
سلام مايليق الا لابو فيصل ومشعابه

انا اصلاً صار لي مدة وكني ياولد مسحور
زمانٍ ماتوقعته ولا ني حاسب حسابه

كارينيو
ترى التدريب ياسامي مهو بدلة وحب ظهور
ولاهو رزرزة شخص ٍ يوري العالم ثيابه

يبي حنكة ومخ وعقل مع خبرة مهيب شهور
يبي لك فوق عشر سنين يزهابك وتزهابه

سامي
الا ياليتني مثلك اعرف شلون كيف تدور
ولا ياليت من يقراء كتاب ٍ انت تقراء به

مدحني صاحبي مدري عسى ماهيب مدحة زور
عليه الله حسيبي من عقب مدحه ومن جابه

كارينيو
خلاص اسمع كلامي لاسمعت اسمي بدون شعور
ابيك تقول (انا مانيب من ياتي ويدرى به)

مادام النصر عوّد للمنصة واعتلى للسور
تراك أصبحت مابين الاسد والذيب وانيابه

سامي
من عيوني ولاجاني من اللي قلت فيه قصور
عسى الله ياخذالكذاب راعي الزيف واعجابه

وانا من شفت شمس العالمي شعت علي بالنور
عرفت اني مع التدريب ياكارينيو زلابه