ســــــر ياقلم !!

الكثير من الناس يظهر بمسوح الاخلاق
وطهر القلب ونقاء السريره يوهم المقربين قبل البعيدين
بصورة ملائكيه سرعان ماتتلاشى
ويسيح مكياج الكذب عن تلك الصوره الفريده
بالاخلاق العاليه .. لتجد نفسك امام صوره متعـريه
بانت فيها تجاعيد القبح ودمامة الخلق
_____

سر ياقلم واكتب تعابير الافكار
وسجل على بيض الصحايف كلامي
عبر عن اللي داخلي واكشف اسرار
عن الرفيق اللي بواره ملامي
اللي بذم الناس له جملة اشعار
حتى غدا كل الخلايق عدامي
حتى الرجال اللي سليلين الاحرار
صاروا بعينه من فروح النعامي
ذمه وصل حتى كبيرين الاعمار
اللي لهم بين الخلايق مقامي
هذاك ناقص بالوفاء عدة اشبار
وهذاك ماله حضوة واحترامي
من شاف زومه قال بالطيب جبار
والبيت عامر بالضيوف الكرامي
وانه على درب الكريمين الاخيار
وان اليدين مسبلات الخطامي
اثره على ماقيل ذي كذبة اخبار
وان الحقيقة موجعه بالعضامي
كان بعيوني ياعرب شمس واقمار
ومكانة منزالها شي سامي
لكن حسافه كل مانشيد انهار
وتبدلت شمس الغلا بالضلامي
وشمع المحبه ذاب وانطفيت انوار
وقطع الوصل اعلنت لوهو حرامي
دام الغلا مبناه ضحكه وكركار
مالي بها شف ولاهي مرامي
انا الغلا عندي بساتين وازهار
واريج عطر في هوى الوصل حامي
ماهي سوالف غش واكذاب كبار
تبان لابان الظروف احتدامي
انا الرفيق اللي اذا الوقت بك دار
لقيتني حمل العوين السنامي
قولي عليه شهود ياميت النار
ماينكره حتى شدايد خصامي
ان كان تجهل رفقتي اسال الجار
واسال عن علومي رجال قرامي
يمكن جهل قلبك وعينك والابصار
يعودك لك ياجاهل في مقامي
يمكن خضار العود في نبت الاشجار
يعود ريعه بعد عود الصرامي
والنبت يرجع في بساتينه اثمــــار
وريع الغلا يرجع لوضعه تمامي
والاطوينا كل ماضي وتذكار
ويمت قوافلنا سيول الهدامي
وصلاة ربي عد ماهلت امطار
واعداد ماهل الودق من غمامي
على النبي اللي به الجود يحتار
الهاشمي اللي به الحق قامي
ضامي بطولة
ابويزيد