أقــوى مــقال يشخــص حـال العالــــمي

لما تشوف الاحداث الماضية ومقابلة ماجد .. ورد كحيلان .. ثم كلام الهريفي .. وقبلهم الدويش والدكتور والقريني ..

تعرف ان علة النصر .. هو ان الكل أصبح يرى نفسه المنقذ .. وهو الأحق بالنادي .. بما فيهم الرئيس !

ابتعاد النصر عن المنافسه وعن البطولات .. جعل الكل يتعدى دوره في النادي .. ويمارس دور الأب والقائد والمنقذ وطبعا مااحد يقدر يكلمه او يرد عليه .. لأنه بيلجمك وبيقول لك .. طيب جبت بطولات ؟ .. لا ؟ خلاص اجل لاتعارض وانت فاشل !

ابتعاد النصر جعل الكل يحس انه هو اللي عنده علة الفريق والحل .. لأنه باختصار جرب جميع حلول الاخرين وماشاف نتيجه ..

المشجع الهلالي مثلا .. غالبا مشجع سبيكة كرويا .. تلقاه مايفهم لا في نقاش ولا تحليل ولا تعليق علي موقف .. ويعاني من تدني في مستوى فن النقد ..

ماهو لأن ربي خالقهم كذا .. او حاط فيهم جينات معينه .. لكن لأنه يشوف ناديه بدون مشاكل ( كما يصور له طبعا ) .. ويحقق بطولات .. ونجومه دائما يوضعون في المقدمه ..

فليه يفكر ؟ .. يفكر في ايش اصلا ؟ .. وش يحلل ؟ وش ينتقد ؟ .. وش يعترض عليه ؟ .. الخ

علشان كذا تعطل مخه .. وصارت وظيفته مقتصره ع التشجيع والتصفيق لا أكثر ..

بعكس المشجع النصراوي .. يخسر فريقه ويخسر ويخسر .. تتغير الاداره .. ويخسر فريقه .. في كل سنه يبتعد أكثر وأكثر عن المنافسه .. فيبدأ يفكر .. ليه نخسر ؟ .. لاعبين وتغيرو .. مدربين وغيرنا .. اجانب وغيرنا .. اداره وتغيرت .. ليه الى الان مارجع النصر ؟ ..

فيبدأ المشجع النصراوي يتابع ويحلل ويناقش ويبحث وينتقد .. ويبدأ يجمع ويقرأ ويستنتج ويدور وراء اي حل ..

وهنا تبدأ المرحلة الخطرة .. لأن هنا بيطلعون أهل الحلول .. وكلن بيتخطف هالجمهور وبيقول انا اللي عندي الحل .. ومن هنا تبدأ الاحزاب .. لأن كل حزب يعتقد ان الحل عنده وان الحزب الثاني هو سبب الانتكاسة .. ومن هنا تبدأ الحرب بين الطرفين لأن الحل بالتأكيد ماراح يتم الا بإزالة الطرف الثاني اللي أكيد راح يكون عائق أمام حل عودة النصر !


المرحلة الأخطر لما تبدأ الاحزاب تختزل لأفراد .. ويبدأ كل فرد يشوف أنه هو صاحب الرأي وهو المنقذ .. وأن هزيمة الآخرين .. هو انتصاره الشخصي ! .. وان انتصاره الشخصي أصبح مطلوب حتى لو على حساب خسارة النصر !!

واعتقد ان هذي هي المرحلة اللي وصلها النصر الآن ..

الكل أصبح أكبر من النصر .. والكل صار يحقق نجاحه وانتصاراته على حساب النصر .. والخاسر الوحيدو الأكبر هو النصر ..

------------

لما ترجع لمقالات الدويش على القريني .. تشوف ان الدويش يأكد ان منطلق نقده هو خوفه على النصر .. وانه يريد مصلحة النصر .. وانه جالس يصف خارطة طريق النصر

ولما تواجهوا واستطاع القريني الدفاع عن نفسه ..
الدويش لم يجد أي منفذ على القريني .. فبدأ يفتح سوالف وقصص المنتديات ..ولما وجد نفسه في طريق الهزيمه .. حول الموضوع لشخصي .. وبدأ يستشهد بأعضاء شرف .. ويدخل معه ناس جاؤو لخدمه النصر .. وطلب مداخلة الداعم أيمن .. ولما ماأعطاه أيمن اللي يبي وفضل أيمن مصلحة النصر على الامور الشخصية .. راح الدويش ينتقد الداعم ويتهمه بالكذب .. وانه راح يدعي عليه أن لايوفقه في خدمة النصر !!

سبحان الله .. مارضى الدويش أن الأمور تعامل معها القريني والداعم بهدوء وبدون تصعيد يضر النصر .. لان هذا معناها هزيمه شخصية له .. ولو كان فيها مصلحة النصر .. لكن فضل انتصاره الشخصي على حساب النصر ..

لذلك مااستغربت مقالته الأخيره وهو يحرض عمر هوساوي انه مايستمر في النصر ولا يجدد ويستغرب كيف عمر يرضى انه يستمر في نادي انقال عنه فيه انه ( يغسل سيارات ) .. ويوجه رسالة مبطنة لغيره ان النصر ماهو بيئة مناسبة للاعبين انهم يتواجدون في نادي فيه القريني وعبدالغني !!

الدويش يقول لادارة النصر الملعب دائما في صفي وينصفني .. وهو يقصد ان هزائم النصر هي خير شاهد على صحة كلامه وانتصار رأيه ..
يعني لو بعد انتقاده للقريني أصبح النصر يفوز وينتصر .. هل كان بيغلب مصلحة النصر وبيقول نعم نصر القريني رد علي ؟ .. أم انه راح يبدأ ينبش ويحاول يستخرج أي مشاكل من تحت الارض ويطلع اسماء لاعبين واعضاء الشرف علشان يضربهم ببعض وىأثر ع الفريق ؟!

--------

تصرف الدويش هو نفسه اللي صاير مع كثير من الجماهير الان .. صار يتمنى خسارة النصر ولا يشوفه ناجح مع هذا الرئيس او هذا المدير او هذا اللاعب .. !

جمهور يحلف ويراهن ان الفريق لن ينجح مع فلان .. ويترقب الهزيمه علشان يركض ويحتفل بانتصار رأيه ..

مجرد ماتشوف فرحة لبعض جمهور النصر لما يضيع الحارثي بلنتي .. ويضيع الفوز ع الفريق .. تعرف ان الفكر النصراوي تعرض لتدمير كلي .. وأصبح من الصعب جدا اعادته للوضع الطبيعي !

الكل أصبح يصنع انتصاراته على حساب النصر ..

--------

الهريفي الان يصنع جماهيريته ( التحليلية ) من خلال هزائم النصر وتوجيه النقد القوي للإدارة ولسلمان والرئيس .. والجمهور صار بعد كل هزيمه يروح يدور كلام الهريفي والنقد القوي والمطالبه بالرحيل .. الخ

الهريفي ورغم اسطوريته كلاعب .. الا أنه فاشل في مجال صنع العلاقات واسلوب الحوار .. وهالشي باعترافه نفسه .. وانه خسر الكثير بسبب هالأسلوب ..

الهريفي في عهد ابو خالد الله يرحمه راح يكلم صحفي وقام يتكلم في ابو خالد ويقول انا لي ١٢ سنه معاناه في النصر .. وخذ لك تسفيل في الادارة .. وبدت قصة انهيار النصر الحقيقية من هذاك الوقت ..
توسع الخلاف وصار ابوخالد يشب ع الهريفي في كل تصريح .. وبعد ماكان ابوخالد يرفض تسلم كأس دوري ١٤١٤ من الملك لأنه كان يشوف ان الهريفي هو الأحق بهذا الشرف .. صار الهريفي فتى حفر بيشة .. !

الهريفي اعلن اعتزاله بعد الخلاف الشهير وتضرر النصر بسبب انفعال وتصاريح .. وبدت الانشقاقات والتحزبات .. وخسر ناس كثير علاقتهم في ابوخالد بسبب الهريفي ..

واخرتها .. بعد سنوات قرر الهريفي يتصالح مع ابوخالد .. ويحب على راسه .. وقرر ابو خالد انه يطلع في شريط الهريفي .. وتحول فتى حفر بيشه .. الى افضل لاعب وسط ايمن في الملاعب السعودية حسب تصريح ابو خالد في الشريط ..

وفجأه .. انتهت سنوات الخلاف .. بسبب تصريح متهور وغير محسوب .. خسر من خلالها النصر وجمهوره .. وزرعت من خلالها اول بذور التحزب اللي مازلنا نعاني منها حتى الان .. وخسر ناس كثير علاقتهم مع ابوخالد وابتعدوا عن النصر .. علشان اخرتها يقرر الهريفي انه غلطان في الاخير ويروح يتصالح ويتأسف ..

طيب والخلافات والاعضاء اللي ابتعدوا والناس اللي خسرناهم من يرجعهم يالهريفي ؟ .. وقتها ماراح تلقى رد من الهريفي لأنه مشغول بشريطه وتسويقه ..

نفس الشي سواه الهريفي مع المطيويع .. لما كان يسميه مشوت الكور في سدوس .. والان صار ضيف من ضيوفه !

طيب واللي قلبو ع المطيويع علشانك وش وضعهم الحين ؟!


الآن الهريفي يتكلم بانتقاد شخصي بعيد كل البعد عن التحليل خلال مباريات النصر ويحرض ع الاداره ويشحن الجمهور ضد الاداره ويصنع خلاف مع فيصل بن تركي والقريني ..

طيب انا مستعد يالهريفي اوقف معك .. واطرد القريني .. هل بتغطي مكانه ؟ .. انا مستعد اطرد كحيلان .. تجي تمسك مكانه وتجيب لي اجانب عالميين زي ماكنت تطلب ؟ ..

انا وش يضمن لي افزع معك الحين واقلب ع النصر ورئيسه ولما نبعده .. يدخل النصر في متاهات وانت تبعد نفسك وتنشغل في وظيفتك .. ثم اخرتها نلقاك تصالحت مع كحيلان وتطلع في صور وانتم تتعشون سوى .. واحنا وقتها نضرب اخماس في اسداس .. والعالم تسحب ع الفريق والفريق يضيع وانت تطلع وتقول انا قلت الفريق ماراح يجيب بطوله وأصلا الفريق وضعه سئ !!

وعلى فكره .. الهريفي نفسه لمح لهالشي .. لما سأله العجمه لو بعدين قال فيصل بن تركي بسوي لك حفل اعتزال .. هل راح تقبل بعد كل هذا ؟ ... شوفو ردة فعل الهريفي وبتعرفون وش اقصد !

ماقال لا ..وانا يهمني النصر ولا اقبل بالاتهامات لي .. بالعكس .. رده فعله انه ماراح يرفض حفل الاعتزال !!

طيب كيف تتباكى على حفل اعتزال ماجد واللي صار له ؟ .. ماتخاف يصير لك نفس الشي ؟

واذا على كلامك حفل الاعتزال يجيب عوائد ومكاسب .. ليه ماتتسلف وتسوي الحفل وتاخذ الارباح لك ؟ .. جب لك برشلونه والملعب راح يمتلي .. هل معقول مافيه عضو شرف فكر انه يسوي لك حفل اعتزال ويتفق معك ان الهدايا لك وعائد الحفل له .. دام ان حفل الاعتزال مربح لهالدرجة ومافيه خساير !!

يعني يالهريفي لما تقول مااقدر اترك وظيفتي وامسك النصر .. وكأنك راح تشتغل ببلاش ..
طيب اجل وراك على مدير الفريق ..؟
وانت عارف ان الجمهور جالس يضغط ع الاداره علشان يعينونك .. وانت كل كلامك انك دايم تقابل اللاعبين وتوجههم وتعطيهم نصاذح .. وفي الاخير تطلع في القنوات تتكلم عن فشل الفريق .. يعني هذا معناه فشلك أنت .. لانك فشلت في تحفيزهم او التأثير عليهم .. وكل توجيهاتك ماجابت نتيجه .. فوش بيتغير لو صرت مدير الفريق ؟!

خلال عشرين دقيقه مع تركي العجمه .. صنع الهريفي خلاف بينه وبين تركي واتهم تركي انه منحاز لفيصل بن تركي ودخل في نيته وحط نفسه انه مظلوم من العجمه ..

كنت اتفرج على فهد .. وجالس اتخيل انه مدير كره ويتناقش مع لاعب مختلف معه .. مثلا مع حسين بعد خلافه مع عمر .. او اي احد ثاني .. هل هذي بتكون طريقة الحوار ؟!

الغريب لما تشوف انتقادات الجمهور للرئيس .. ( تصريحات انفعاليه + مايوزن الكلام + غير دبلوماسي + يصنع خلافات واعداء .. الخ )

ثم بعدها تشوفهم يطالبون بالهريفي كمدير للكره !! .. وش هالتناقض ؟

ماادري هل هم يشوفون نفس الهريفي اللي نشوفه ؟ ..

يعني هل راح نكون مبسوطين لما الهريفي يجتمع مع اللاعبين .. ثم يطلع ويقول تراهم يدخنون ويجلس يبشرنا في الاعلام بتدخينهم ؟!

والمشكله رفق دربه ماجد عبدالله كان اكبر مدخن لدرجة انه يدخن بين الشوطين احيانا ..!

الهريفي لما طلع مع العجمه .. انحرج يجاوب ع السؤال ويعترف انه رافض العمل الا بعد حفل الاعتزال واللي ماراح يسويه له الا فيصل بن تركي .. ولأن شكله بيطلع سئ امام الجمهور .. راح يجيب سوالف ماجد ونتائج النصر ووعود الرئيس علشان يغطي على الجواب ورده فعل الجمهور حوله !


وهذا نفس اللي سواه عمران .. لما استحى يقول انا فعلا دعمي لصفقه القحطاني اللي ازعجت العالم فيه وتطاقيت مع منصور بن سعود عشانه كان مجرد سلف وطلبت يرجع لي بعد خمس ايام !!

لان وقتها الجمهور بيقول انخدعنا فيك ياعمران .. اخرتها تسليف والاداره ساترة عليك ؟..

فلذلك راح يجيب سوالف يمين ويسار وان ارئيس قال وقال ودخل ماجد والحارثي وعبدالغني علشان يغطي ع الموضوع الاساسي .. ان دعمه مجرد ( سلف ) !

وطبعا راح يراهن على فشل الفريق .. وتكلم ان الرئيس مايدفع زي مالناس متصوره .. ولما سألوه طيب ان لك نيه تستلم الرئاسة ؟ لك نية تنقذ فريقك اللي تحبه وتعشقه ؟ ... قال لا لان رئاسة النادي كلها خساير فلوس هههههه .. وماراح استلم الا لما تصير خصخصه واتربح من النادي ... والى ذلك الحين .. عمران يسلم عليكم !

تكلم عمران عن وعود الرئيس .. ولما سألوه .. طيب وين الاكاديميه الي وعدت فيها ياعمران ؟ .. قال والله انشغلت ويوم شفت الداعم يشتغل عطيته ٢٠٠ الف


الهريفي يقول لن أسمح ان ينهدم النصر اللي بناه جيلي .. وبصراحه ماادري وش الخطوات اللي بيسويها علشان ماينهدم النصر .. او انها مقرونه بحفل الاعتزال ؟


ياعالم يانصراويين ياعزيزين .. وين اللي يطق صدره ويقول انا لها ؟ .. وين اللي يقول عطوني ادارة الفريق بدل القريني الفاشل ؟ .. ليه وقت الترشح للرئاسة ماشفنا احد يقول انا للرئاسة واتركوكم من فيصل بن تركي الفاشل !

انا هنا اجد نفسي مضطر للأسف اني احترم الامير ممدوح .. لأنه هو الوحيد اللي لما عارض ..قال انا البديل .. ولما انتقد الاجانب .. قال انا اجيب رونالدينو وبيكهام ..

ولولا اننا عارفين انه كذاب وانلسعنا منه .. كان كلنا الان في صفة وقلبنا النادي على كحيلان !

وش خلانا نقلب على ادارة الوليد الا لما شفنا فيصل بن تركي ولما اعلن انه بيرشح نفسه للرئاسة ؟!

وبعدين السؤال اللي يطرح نفسه .. لما تشوف انتقادات الدويش والهريفي وماجد والشعلان .. هل هذا معناها ان الله اصطفاهم بالرأي الصحيح .. وان سبحان الله طلع الرأي الخطأ هو رأي ايو احد يشتغل في النصر ؟

هل تعلم عزيزي النصراوي .. ان الدويش في احد مقالاته .. يطالب بالتعاقد مع محمد العنبر ويرى انه هو المهاجم الحقيقي ؟ .. تخيل لو الدويش رئيس النصر !

هل تعلم عزيزي النصراوي .. ان فهد الهريفي في احد حواراته يطالب بالوقوف مع سعد الحارثي ويرى فيه المهاجم المنقذ وانتقد زينقا بشدة لعدم اشراكه في مباراة الهلال ؟

هل تعلم ان ماجد عبدالله وفي عز انتقاد الجمهور لهزازي والمبارك .. كان ماجد يراهم يستحقون التشكيله الاساسية في النصر ؟

وكان يمتدح شريفي ويراه الافضل لحراسة النصر .. وكان يهاجم الخوجلي لعيون شريفي ..

هل كنتم مستعدين تتحملون ارائهم السابقه لو طبقوها وخسر النصر بوجودهم في مناصب ادارية ؟


-----------------

من وجهة نظري اشوف ان الادارة لما تكون في موقف ضعف .. نفسيا يصير الواحد يرغب انه يبتعد عنها ويكون محسوب ع الجهة الثانيه .. والوضع الاداري الضعيف .. وانقلاب الاغلب عليها ..يشجع الواحد نفسيا انه يبحث عن اللي في صالحة ويواجه الادارة فيه ..

بالنسبة لي هذا اللي سواه ماجد عبدالله الاسطورة الاولى في حواره الاخير مع عكاظ ..

ماجد انسأل قبل اكثر من سنة في جريدة الرياضي .. يقال انك لم تستلم شي من عوائد حفل اعتزالك ؟ ... ماجد رفض الاجابه والتعليق ..

الان يعاد نفس السؤال على ماجد .. ويقول لا مااستلمت شي .. ومااكتفى بهالجواب .. ولكن اتهم فيصل بن تركي انه ماخسر شي على الحفل .. وان كل اللي دفعه رجع له ..

وش السبب اللي خلى ماجد قبل سنه يسكت والان يتكلم ؟ ... الجواب على بلاطة .. ان قبل سنه كان الجمهور مع كحيلان .. والان اغلب الجمهور شايل عليه .. فهذا هو الوقت المناسب ..

ماجد ماحب يصطدم بجمهور كحيلان في هذاك الوقت .. ولكن الان مافيه جمهور راح يصطدم معاه .. والاغلب بيكون معه .. وهذا اللي سواه النعيمة مثلا مع سامي لما تهجم عليه بعد هزايم الاتحاد ..!

لو تهجم عليه قبل مع ان سامي كان يسحب ع الفريق .. لكن كان الفريق يفوز .. كان الجمهور بيقلب على النعيمة .. لكن النعيمة اختار التوقيت الصح ..

لذلك متأكد ميه بالميه .. لو الصحفي كان حر وماكان تابع لمنتدى ماسا .. وسأل ماجد .. طيب هل استلمت الـ ٢٥ مليون اللي وعدك فيها ممدوح وطلع امام الناس في حفل التكريم واعلن انه بيعطيك ٢٥ مليون .. هل استلمتها ؟

ماجد ماراح يجاوب ع السؤال وماراح يتطرق له ... لأنه يعرف ان ممدوح في وضع قوة الان .. وان منتدى ماسا ماعنده اي مانع يقلب على ماجد زي ماقلب على الهريفي ايام حياة الرمز ..

خصوصا ان ماجد يشوف الان كيف ان جمهور ماسا صار يحب الهريفي الحين ويموت فيه .. بعد ماكان منبوذ بسبب خلافه مع الرمز .. وكيف ان الكاتب المطرود .. صار عندهم الآن يسمى عميد الكتاب .. والسبب انهم يصنفون ضد الادارة ..

لذلك ماجد ماعنده استعداد يدخل هالمخاطرة .. بينما يفضل انه يثير مسألة حقوق حفل اعتزال .. لما سأل بتال ماجد .. ليه ماتقبل منصب مدير الكره لعيون فيصل بن تركي لأنه سوى لك حفل اعتزال ؟..
رد ماجد وقال ماطلبت منه يسوي لي حفل ! ...
لكنك ياماجد تطلب منه الان يدفع لك فوق اللي جاك !

-----------

فيصل بن تركي شخص يفتقد لأبسط مبادئ الدبلوماسية والحكمة في التصرف في المواقف الصعبة .. وكان ممكن بتصريح هادئ انه يكسب الجولة ضد ماجد والهريفي وقبلهم عمران ..

لكن الرئيس واضح انه مايحتمل الضغط والنقد الشخصي .. وانا متأكد مليون بالمية .. ان اعلان ندمه علي حفل اعتزال الهريفي .. ماهو علشان المساومه .. لان الهريفي سبق وصرح اكثر من مره بهالموضوع .. ولكن لأن الهريفي أصبح يهاجم الإدارة بضراوة .. ويشكل ضغط كبير على فيصل بن تركي بانتقاداته ..

وحتى في موضوع ماجد .. الرئيس اول مارجع جاوب جواب دبلوماسي في برنامج الملعب وذكر ان اللي بينه وبين ماجد أمر خاص بالنصر وبينحل داخل البيت النصراوي ..

وكان جواب جميل .. وكانت نقطه لصالح بن تركي ضد ماجد .. ولكن لأن الكلام بدأ يتسع .. واصبح بعض الجمهور في المنتديات وغيرها يتهم كحيلان بأخذ الارباح وانه تربح من الاعتزال وماخسر شي ويستشهدون بكلام ماجد ... ماتحمل الضغط وطلع علشان يقول ان الاعتزال مافيه ارباح وان ماجد ماله شي وان عنده الاوراق كامله ..

هذا الرد راح يضع الكره في ملعب ماجد من جديد .. واكيد ماجد خلال اليومين الجاية راح يطلع ويرد ع الكلام .. وبنعيش فاصل من الردح الاعلامي .. وبينقلب الوضع من الاهتمام بالفريق ي الملعب .. الى الاهتمام بالتصاريح خارج الملعب .. والخاسر طبعا معروف .. !

وللأسف ان مافيه أحد داس على نفسه شوي .. وقدم مصلحة النصر على نفسه .. حتى الرئيس !


-------------------

بالنسبة لي .. انا اسطورتي الاولى هو ماجد عبدالله .. والثاني هو فهد الهريفي .. ولكن ناديي اللي اشجعه ومضيع اغلب وقتي في ملاحقته هو النصر .. واللي يقود النصر الان هو فيصل بن تركي بكل اخطاءه وسلبياته ..

ماجد يقول فلوس اعتزالي اولا ... والهريفي يقول حفل اعتزالي اولا ..

وانا اقول نصري اولا ..

هل ماجد لو اخذ فلوسه بيجيب لي لاعبين وبيطور النصر ؟

هل الهريفي لو سوينا له حفل اعتزال بيجي وبيقود الفريق للبطولات ؟

لذلك انا مع الفريق .. وانا اللي يهمني الفريق .. وتهمني رواتب عمر هوساوي أكثر من فلوس ماجد عبدالله ..

ويهمني ان حسين عبدالغني يركز في المباريات الحاسمة أكثر من اهتمامي بحفل اعتزال الهريفي ..

لذلك من حقك ياماجد تهتم بمصلحتك .. ومن حقك يافهد تهتم بمصلحتك ... وانا من حقي اهتم بمصلحتي كمشجع .. ومصلحتي انا الان مع فيصل بن تركي .. وهو المسؤول أمامي عن الفريق .. وهو الي راح يغير ويقرر ويشيل ويحط ..

اما انتم فتبقون اساطير في قلوبنا .. ولكن ماهو مطلوب منا نتخلي عن الفريق علشان اموركم الخاصة .. واسقاط الادارة لو ضرتنا بعدين .. ماراح تفيدونا وقتها .. ولاراح واحد فيكم يطق على صدره ويقول انا لها ..

ماجد رجال كبير وفاهم ويقدر يلاحق ورا حقوقه .. والهريفي رجال وفاهم واكيد بعد ماعرف ان حفل الاعتزال يجيب ارباح ومكاسب بيقدر يدبر فلوس ويسوي فيها حفل اعتزاله ..

انا ماني مجبور ان فوق هم الفريق .. اتحمل همومهم الخاصة .. لأنهم ماهم مجبورين يهتمون لي ويقولون متنازلين عن قضايانا لعيون المشجع النصراوي الصبور ..


انا نصراوي .. والنصر هو همي الاول .. واهتمامي الآن منصب على عودته .. ومضطر اصبر واتحمل وازعل واناقش وادافع علشانه بس هو ..

ولأني اخترته كفريق لي وبقناعة تامه .. انا لازم اتحمله واتحمل اخفاقاته واوقف معاه لغاية مايرجع ..

ومثل ماقال بن فطيس .... مالك الا " النصر " .. ويش وداك له ..


تحياتي ...

منقول للرائع ابو دمجه

مقال رائع جدا فيه الكثير من الواقعيه والصراحه ولكن في نظرى افتقاد النصر لشخصيه قياديه قويه قد جعل الكل يتطاول على النصر كنادى وكتاريخ ورجالات ايضا
نعم للنتائج تاثيرها ولكن ايضا لرجالات النصر وقوة شخصيتها تاثيرها الاقوى
في زمن الرمز ونتائج الفريق كانت سيئه لم يكن احدا يجرئ حتى على مجرد الحديث او المساس بالنصر ورجالاته اما اليوم فالكل يملك الجرائه على الانتقاد والتجريح في كل مايختص بالنصر

الوافي يعطيك العافيه ع مرووووورك

الله يعطيك آآلف على النقل .
مقال في الصميم يحكي واقعنا المرير .

مشكور على النقـل ^

مقال رائع من شخص رائع , ولكن خاتمة المقال كانت بخلاف مقدمته ومتنه , فنحن نتمنى ان يكافئ كل من خدم النصر سواءا من ادارة فيصل بن تركي او من اعضاء الشرف , لانه على قولتك ان رواتب عمر هوساوي اهم عندك من حقوق ماجد بسبب ان ماجد (ماضي) وهوساوي |(حاضر) اعتقد ان هذا الامر فيه نوع من النرجسية , فلا اعتقد ان كل لاعب من لعيبة النصر لم يتاثر من جراء ماحدث للنجوم السابقين لانهم اذا اعطاهم الله عمر بيصبح حالهم كحال سلفهم ,مع ان قيمة اللعيبة السابقين في وجهة نظري لم يصل لها ايا من اللاعبين الحاليين
فاعتقد ان من اهم الامور النظر للماضي ودراسته وتقييمه ومن ثم التخطيط للمستقبل ان اراد الرئيس (الذي جميعا ندعمه) بتحقيق الانجازات .

المشاركة الأصلية كتبت بواسطة ضاري الثنيان

الله يعطيك آآلف على النقل .


مقال في الصميم يحكي واقعنا المرير .

الله يعافيك فديتك

المشاركة الأصلية كتبت بواسطة فـيـصـل الثـنـيـان

مشكور على النقـل ^

العفو منوووووووووور

المشاركة الأصلية كتبت بواسطة فهد911

مقال رائع من شخص رائع , ولكن خاتمة المقال كانت بخلاف مقدمته ومتنه , فنحن نتمنى ان يكافئ كل من خدم النصر سواءا من ادارة فيصل بن تركي او من اعضاء الشرف , لانه على قولتك ان رواتب عمر هوساوي اهم عندك من حقوق ماجد بسبب ان ماجد (ماضي) وهوساوي |(حاضر) اعتقد ان هذا الامر فيه نوع من النرجسية , فلا اعتقد ان كل لاعب من لعيبة النصر لم يتاثر من جراء ماحدث للنجوم السابقين لانهم اذا اعطاهم الله عمر بيصبح حالهم كحال سلفهم ,مع ان قيمة اللعيبة السابقين في وجهة نظري لم يصل لها ايا من اللاعبين الحاليين
فاعتقد ان من اهم الامور النظر للماضي ودراسته وتقييمه ومن ثم التخطيط للمستقبل ان اراد الرئيس (الذي جميعا ندعمه) بتحقيق الانجازات .

فديت توضيحك يا غالي منور

الله يصبر عشاقه بس