من بغى الفرقا

من بغى الفرقا لقى له عذر واسباب ودليل

خل عنك العذر والاسباب دام الحب ضاع

كان ودك بالفراق ابشر عسى عمرك طويل

لاتردد وانت لك كلمه ولك امر مطاع

لي عليك انك تبت بكلمه تشفى الغليل

ولك علي اني لأوقف وقفة الرجل الشجاع

لاتجاملني مخافة قال مدري خوف قيل

عمر هرج الناس مايسمن ولايغني جياع

كان قصدك سر حبك اوعدك لأصبح بخيل

واحمل اسرارك معي للموت قدر المستطاع

بس قلها .. قل مااحبك وايشر بصبر جميل

لاتحسب اني مثل من طبعهم لوي الذارع

صاحبك ماهو كذا ياصاحب القد النحيل

صاحبك طبعه غريب وغربته غربة طباع

في الهوى مايقبل الحل الوسط ولا القليل

مثل ماهو لاشرى يشري ليامن باع باع

ثابت لو هي تميل الارض حدره مايميل

يدري ان الفقر ماهو عيب والدنيا متاع

ماعشق لذة حياته كثر عشق المستحيل

ولا كره حتى مماته كثر كره الانصياع

كم تعلم من شديد البدو وش معنى الرحيل

وكم تعلم من غروب الشمس وش معنى الوادع

وكم تعلم من سحاب الصيف وش معنى الحصيل

وكم تعلم من ليال البرد وش معنى الضياع

ايه انا هذا طريقي موحش وصعب وطويل

وانت لامنك تعبت ... العالم فجوجه وساع

اعتبرني في بداية سكتك عابر سبيل

ورح وانا قلبي معك من وين وجهت الشراع

يكفي اني لا انذكرت في سالفة عشاق قيل

عاشر احبابه شجاع وفارق احبابه شجاع



مماراق لي ....

قصيدة رائعه
يعطيك العافيه
رائع في اختيارك
وسلمت اناملك
دمت بود

يعطيك الف عافيه على الطرح الرائع سلمت اناملك الذهبيه

تسلم يمناك ويعطيك العافيه ..

تحياتي ،،

مبدع ياعااااشق
دائما تحسن الاختيااااااااااار
وصح لسان الشاعر
يعطيك العافيه

كلمات رائعه

يعطيك العافيه ع القصيدهـ الرائعه

سلمت اناملك يالغلا ع اختيارك الجميل

لاهنت