بتمعن لمن اراد معرفة حقيقة اعضاء الشرف

بسم الله الرحمن الرحيم


السلام عليكم ورحمة الله وبركاته












بالنسبه لاعضاء الشرف ..فكان ودي من فتره افتح هالموضوع .. خصوصا اننا لازم نعترف اننا نادي ظروفه كانت فرصه للعديد من المتسلقين انهم يكونون جماهيريه شخصيه ..تكونت على حساب نادي النصر !



فنادي النصر يعاني من مشكله الانكسار اللي صار له من بعد سنه ٢٠٠٠ وحتى فتره قريبه .. تم تدمير هيبه النصر وقوته وسمعته الاداريه في الوسط الرياضي ..


هالشي خلى كثير من اعضاء الشرف يرون انهم اصحاب المنه على النصر .. وليس العكس !


ولما يرى عضو الشرف انه قدم عدد من الملايين فهو يرى انه عطى النادي وجه ( بزياده ) .. ويستحق مقابل ذلك قليلا من السلطه والتحكم وفرض الاراء .. !


وهالطريقه ماهي فقط كنوع من التعويض عن الدعم المقدم .. لكنها احيانا تستخدم كعذر للابتعاد عن الدعم بعد اخذ الشهره الكافيه ..


جمهور النصر وبسبب سنوات الضياع والانكسار .. اصبح يرى اي رجل يدخل من بوابه النادي حامل في يده شيك .. بأنه هو ( المنقذ ) !


واصبح لديهم هاجس بأن هذا المنقذ لايجب ان يقال له ( لا ) .. ولا يحق لأحد ان يعارضه .. ولا يجادله .. والسبب انه ( المنقذ ) !


لذلك لو رجعنا بشريط الذاكره للوراء .. وشفنا مثال ( شاهر الصعيري ) .. لشاهدنا مثال حي ومباشر عن كيف وصل جمهور النصر من اليأس لدرجه سمح فيها لشاهر النصاب انه يتلاعب فيه كيفما يشاء ويدغدغ مشاعرهم بكلمات تحمل الفاظ الملايين والدعم وعوده النصر ومحترفين عالميين وماشابه !



لذلك صار نادي النصر الوسيله الاضمن والاسرع والانجح لتحقيق الشهره الواسعه وكذلك تحقيق منافع شخصيه من خلال تكوين علاقات مع وجهاء المجتمع لتحقيق مكاسب خاصه ..


( نادي محتاج + جمهور كبير واعلام متابع ) ..معناها ان كل مايحتاجه عضو الشرف هو قليل من المال للوصول والشهره وتحقيق المنافع الخاصه ..


قليل من اعضاء الشرف كانو هم الصادقين والحريصين على مصلحة النصر .. ووقفو مع النادي مع مختلف اداراته دون شروط او صنع اعذار .. وعلى رأسهم كحيلان .. والذي لازال النصراويين يذكرون له صفقه الغشيان في عهد الرئيس الراحل عبدالرحمن بن سعود رغم انه في ذلك الوقت كان يبلغ الـ سادسه والعشرين من العمر !


وراح ارجع لفيصل بن تركي .. بعد مااكمل نقطه اعضاء الشرف الجدد ..


مشكله اعضاء الشرف هو سرعه غرورهم بالجماهيريه المعقوده حولهم ..واللي تطلب منهم اكثر من استطاعتهم ..


عضو الشرف في النصر تبهره الشهره السريعه والوصول الاعلامي القياسي .. ولكن في الاخير يدرك انه وقع في حفرة المطالب الجماهيريه الكبيره .. واللي عاده تكون اكبر منه ..


لذلك يلجأ بعض اعضاء الشرف الى الابتعاد بهدوء ..تاركا امر ابتعاده غامضا ومتروكا لتأويلات الجمهور ..ومحافظها على سمعته الحسنه اللتي كونها بدعمه السابق ..


والبعض الاخر لايريد ترك الساحه لذلك يبدأ باختراع الاعذار .. وطلب طلبات مستحيله التنفيذ للتعذر بعدم الدعم مستقبلا مع الابقاء على الجماهيريه ..


وللأسف ان النوعيه الثانيه خطرها كبير جدا .. حيث انها تهتم بسمعتها الشخصيه حتى على حساب النادي .. بل ويصل بها الامر الى تمني خساره النادي لكي يصبح امام الجمهور على حق .. ويبدأ بتطبيق نظريه ( شفتوا ؟ قايل لكم انا انهم فاشلين ) !


وهالشي لو تلاحظون يصير حتى مع اعضاء المنتديات .. اللي اذا قال رأي في لاعب ورد عليه بمستواه وذكروه الاعضاء برأيه .. راح وصار يتمنى ان اللاعب يفشل في المباراه الجايه علشان يقول ( شفتوا .. قايلكم انه فاشل ) !


نفس الشي هو هو يسوونه اعضاء الشرف اللي من النوع الثاني ..


في فتره عبدالرحمن بن سعود الله يرحمه .. كان فيه اعضاء شرف يحتفلون بخساره النصر للنهائيات وكانو يسوون ( عزايم وحفلات ) ! .. ووالله اني اعرفهم .. وماراح اقول منهم لانه مايهم الحين ..


لكن كان فشل ابوخالد هو نجاح بالنسبه لهم .. لانهم معارضين سياسته .. لذلك لما كان ابوخالد يجيب بطوله ويظهر بمظهر المنتصر والجماهير تلتف حوله .. كان هالشي يضرهم لان مااحد راح يسمع لهم بعدين !


لذلك كان لابد من ان النصر يفشل علشان يظهرون بمظهر المنقذين .. ويستغلون حنق وغضب الجمهور لمصلحتهم ..


المشكله كثير منهم لما توفى ابوخالد ماعاد شفناهم .. وكأنهم تفاجأو ان العذر حقهم راح فجأه بدون سابق انذار ... لانهم كانو مصورين للجمهور ان عندهم دعم ومخططات وان الحل كان بيدهم .. لكن مامنعهم الا تواجد عبدالرحمن بن سعود وديكتاتوريته .. لكن لما راح واكتشفو ان وراهم شغل جامد .. ابتعدو وهربو من النادي على طريقه ( محد شاف ) !


نفس الشي كان يصير مع اداره الوليد بن بدر .. اللي كان هو وطلال الرشيد ابرز محاربي ابوخالد في المنتديات وبشهادتهم ..وكانو يستفيدون من فشل ابوخالد .. وتزيد شعبيتهم مع كل هزيمه للنصر .. ولما استلمو الاداره .. صارت كل مطالبهم انهم يسكرون المنتديات اللي انقلبت عليهم وحاربتهم !!


وشفنا اغلب شغل الوليد على مسأله المنتديات ..مع انه في السابق كان يعتبرها منبر للحريه ومحاربه الديكتاتوريه .. لكن لما اكتوى بنارها .. وعرف ان المهمة في النصر اصعب ممايتصور .. بدأ باستخدام ديكتاتوريته الخاصه وحاول يوقف المنتديات المخالفه لتوجهاته !



سامي الطويل كان مجرد مثال جديد لا اكثر .. بعد قرائتي للحوار معه في منتدى العالميات .. ايقنت انه شخص تورط بعد ان اعطاه الجمهور اكبر من حجمه .. فحب يسوي فهلوي ويخترع مشاكل خاصه وطلبات مستحيله علشان يبرر بها عدم مواصله الدعم بنفس القدره السابقه .. !


سامي الطويل طالب في حواراته .. بابعاد البحري والحارثي وفيقارو وحسام غالي من قائمه اللاعبين .. والقريني من قائمه الاداريين .. علشان يرجع يدعم !


ومثل ماممدوح اعلن في العربية ان النصر لن يعود بالبطولات الا بعوده الفكر القديم للنادي وهو فكر ابناء الرمز .. فسامي صرح انه لن تقوم للنصر قائمه وهؤلاء موجودين في النادي .. !



باختصار .. هل تظنون ان هالشخصين بيفرحون لو النصر حقق نجاحات وبطولات هالفتره ؟! ... صدقوني لا ..


كل ماينتظرونه الان هو الفشل والفشل فقط علشان يطلعون امام الجمهور بمظهر المنقذين المظلومين .. ويقولون .. شفتو اللي حذرنا منه ؟


سامي الطويل ذكر انه ماساهم هالموسم في اي من الصفقات بولا هلله .. في حين دعم سابقا بالملايين .. في اشاره واضحه الى ان دعمه اصبح مشروط !


وفي سؤاله عن استعدادات النصر للاسيويه .. طالب بتوجيه السؤال للقريني ووصف القريني انه لايستطيع اعداد فريق حواري فكيف بفريق مثل النصر ؟


هل تعتقدون ان سامي بيبارك للقريني وبيعترف بنجاحه لو النصر حقق نجاحات في الاسيويه ؟!


سامي في حواره .. ذكر انه كان بيجيب الشهري بـ ٨٠٠ الف مع انه مايعرف منهو الشهري !


ولما سألوه عن اجانب النصر ذكر انه مايعرفهم ولاقد شافهم ....


وذكر انه وعد هالموسم بجلب اكثر من لاعب عالمي للنصر .. ولكن!!! .. ثم وضع علامات تعجب واستفهام !!!


المشكله عندما سألوه عن اللاعب العالمي الروماني ولاعب اليوفينتوس وتشيلسي وفيورنتينا السابق ادريان موتو ..ذكر انه لم يسمع بهذا اللاعب من قبل !!!



ثم عاد للتجريح في القريني والحارثي وفيقاروا وطالب بابعادهم .. مع تكرار التذكير بدعمه السابق وانه لم يدفع هلله في هذا الموسم الجديد !!



النكته الكبيره انه اعترف انه فيصل بن تركي عرض عليه منصب نائب الرئيس قبل السلهام .. ولكنه رفض لانه مشغول .. !




-------


طبعا لو اني عضو شرف جديد وانعم الله علي بملايين وثروات لاتحصى .. وابي اوصل للشهره واكون جماهيريه وعلاقات بسرعه البرق من خلال نادي جماهيري مثل النصر ..


كل مااحتاجه هو اخذ مليون من هالملايين .. وتقسيمها الى عشره اجزاء .. كل جزء عبارة عن ميه الف ..


ثم الخروج بتصريح ناري يتضمن كلمات عن عوده النصر والدعم والوقوف ... ثم ابدأ ادعم كل فتره بميه الف .. واحاول اخليها في شي ظاهر ويرسخ في ذهن الجمهور.. مثل تكفل بعلاج مصاب .. او اكمال صفقه لاعب شاب وماشابه ..


بنهايه السنه .. وبنهايه المليون .. اكون وقتها وصلت للي ابيه .. وطبعا شي اكيد ان الجماهير كلها بتعقد امال علي .. وراح تعدني مع اعضاء الشرف الكبار .. خصوصا لما تعرف ان منصور بن سعود هو كبير النصراويين .. فراح تعرف انه مايبيلك شي علشان توصل للمراتب العليا في النصر !


طبعا بعدها علشان اتعذر بعدم الدعم .. اخترع لي اي مشكله او مطالبات .. اما مطالبات اني افرض رأيي .. او اخترع لي مشكله مع كم لاعب واطالب بطردهم .. او مع اداري واطالب بطرده .. واظهر بمظهر الحزين على حال النصر في ظل تواجد هؤلاء .. وبعد كل هزيمه اطلع للجمهور واقول شفتوا ؟ .. ماقلت لكم .... وطبعا الجمهور بيشب على الاداره وبيوقفون معي لان في حاله الهزيمه وضيقه الصدر تكون ردات الفعل عاطفيه وغير مسؤوله ولامتزنه !



عوده لكلامي عن فيصل بن تركي .. اقول هو العضو الوحيد الي وقف مع كل ادارات النصر ودعمها ..



فعبدالرحمن بن سعود في مقالاته كان يضعه مع اكبر الداعمين له رغم انه ذاك الوقت كان بالعشرينات !


وفي عهد سعد بن فيصل كان من اكبر الداعمين له واول الحاضرين للاجتماع الشرفي .. وقدم تبرعه بدون شروط او قيود ..


وفي عهد اداره الوليد اصبح اشهر من الاداره نفسها في ظل دعمه المتواصل الى درجه اطلق عليه لقب كحيلان .. وتم ترشيحه للرئاسه ..!



هل كان فيصل بن تركي راضي عن كل هالادارات وراضي عن كل قراراتها ؟ .. مستعد احلف ان هالكلام غير صحيح .. لكن فيصل بن تركي غلب محبه النصر على اراءه الشخصيه ودعم .. !


والان يستكثرون عليه انه يكون له رأي خاص او ان يقرر مصير النصر رغم انها من صلاحياته !


اعضاء شرف كثيرين .. كانو اعضاء كلام .. ووقت الدفع ينحاشون ..


واعضاء شرف كثير كانو مرتزين ايام اللاعب بميه الف واغلى لاعب حده مليونين .. ولما ارتفعت المصاريف راحو بلارجعه !


لكن فيصل بن تركي كانت افعاله سابقه اقواله .. وكانت الادارات تشهد له بدون مايطلب شهاداتهم .. وكان اول الداعمين ايام اللاعب ابو ميه الف وايام اللاعب بثلاثين مليون !


ومع انه يتلقى اكبر خذلان شرفي .. لدرجه ان الدعم صار مجرد دعم بالكلام والمسانده الروحيه .. زي مايسوي الوليد بن بدر ..وهذي صارت كافيه انها تخليك من كبار اعضاء شرف النصر ..لمجرد انك كافي شرك عن النادي ماليا ! .... واذا كان فيه دعم مالي فهو بسيط والكثير منه يصير سلف واجب على فيصل بن تركي ارجاعه !



الدويش لمح في مقالته ان فيصل بن تركي ناكر للجميل .. ولا ادري منهو اللي تم انكار جميله ! .. ومنهو اللي وقف مع الادارات السابقه ولما رأس مالقى احد معه ! ..


واللي كان يسكت عن حماقات اداريه وقرارات اثرت على تاريخ النصر .. ولما صار الان يبرم الصفقات .. صار يوصف بانه قليل خبره وماينفع وقراراته خاطئه واي زله منه يتم تضخيمها لدرجه تحس انه المتسبب بابتعاد النصر عن البطولات من سنوات !



فيصل بن تركي .. فقط .. هو من يحق لي ان اسميه عضو شرف حقيقي وداعم ( للنصر )
.. فالرجل الداعم لكل الادارات بدون شروط وبدون تصريحات وبدون فرض اراء هو رجل النصر الحقيقي .. اما اصحاب نظريه ( سوو اللي ابي ولا ابقطع دعمي عنكم ) ..


فالنصر لابد ان ينتفض لكي يتخلص من هذه النوعيات .. ويصير التبرع المالي لنادي النصر وقتها شرف يتمنى ان يحظى به أي شخص .. لكي ع الاقل يشوف اسمه مكتوب بخط صغير في صحيفه .. ويشوف موضوع عن دعمه في احد المنتديات .. بدل هالطهبله والصجه واللجه لاعضاء شرف ماقدمو لتاريخ النصر واداراته الا القليل .. ومع ذلك لما تشوفهم في الصحف تعتقد انهم اسسو النادي من جديد واتو بمالم تأتي به الاوائل !



والله يوفق العالمي ..

مشكور اخوي والله يعطيك العافيه
وتقبل مروري