لا تصاحب اللي بحزة الضيق نساق

وقفة مع نصيحة الشاعر غانم الجنفاوي

لا تصاحب اللي بحزة الضيق نساق

سعد الحافي

بديت باسم اللي سمك سبع الاطباق

عالم خفا ما يكتم المودماني

اللي خلق ليلٍ عن الصبح ينساق

كلٍ يقدر له محل ومكاني

لى راح هذا.. ذاك يقبل بالافاق

يجرن على طول الدهر والزماني

لا قاصرٍ هذا ولا ذاك سباق

لى اقفى النهار يقرب الليل داني

اللي خلق خلقٍ على اصناف وارناق

لى شفت لك صنفٍ الى ذاك ثاني

اللي كتب لك لو تونيت ما يذاق

إن كان ما جيته فهو جاك عاني

ما يقطعه بالحسد ماكر وفساق

ولا يدركونه بالحياله اذهاني

بيد الكريم اللي للاصباح فلاق

عساه يقسم لي بخير وحساني

ما صك دونه باب قفلٍ ومغلاق

ولا حط ناطورٍ وراه ايحداني

يالله برزقٍ منك يا والي الارزاق

يا واحدٍ مالك شريكٍ وثاني

لا صار انا معوز ومحتق ومفتاق

وانت الكريم الرازق ابا الحساني

ما نيب سباقٍ ولا نيب منعاق

عن ما كتب لي بالخفا والبياني

ولا نيب لفاق ولا نيب عقاق

راضي بقسمة ربي اللي عطاني

ومن عقب هذا البال والفكر مشتاق

لنظم القوافي من حلي المعاني

الى بغيت أخذ على القاف طوراق

القاه ماجودٍ بطارف لساني

اخذ منه ما كان جايز وما لاق

وارمي هزيله واخذ اللي سماني

ثم انظمه وانا على الزين شفاق

نظم الخرز بارقاب نجل العياني

أوصيك ياللي للنبا الزين فراق

اسمع كلامي يا عريب المجاني

علمٍ صحيحٍ ما يلفق بالاوراق

هرج الى ورد تشوفه بياني

خلك بربك دايم الدوم وثاق

حتى يحطك في عراه المتاني

وناجه الى طقك من الجال طقاق

وارجه عوينٍ لك بكل المعاني

واصبر على ما جاك من الوقت لو ضاق

ان كان ناشك من زمانك هواني

وبالك تصير بكل الاحوال مطفاق

ان شفت وقتك يا فتى الجود زاني

لو زان عش وقتك أيام ما لاق

ملزوم تلقى به رفاع وطماني

شف لك رفيقٍ يوم نشفات الارياق

ما ينكمر باسمه براسه نواني

ولا تصاحب اللي بحزة الضيق نساق

عليك بالطيب وخل الهداني

عليك باللي للنواميس عشاق

هميلعٍ من مطلقين اليماني

يشيل ما حمل ولو كان ما طاق

يصبر على الشده وسيع البطاني

والطيب ما يجلب ويشرى بالاسواق

ولا ينكسب بالهملعه والتماني

وحذراك عن رفقة هذورٍ وملاق

رواغ اروغ من نشيط الحصاني

الى هرج ماهو الى قال صداق

مع الخيانه بالخفا مسرداني

لا تامنه لو كان يعطيك ميثاق

ما ينعرف له مذهبٍ قلباني

والأجل مكتوبٍ بخطٍ بالاعناق

الرب حي وكل مخلوق فاني

ما يذبح الرجال تسعين تفاق

إلى صار ما أجلك بالأسباب داني

تبقى لموعد ربك اللي بالأوراق

لا سابقٍ ساعه ولا انت امتواني

يا الله انا طالبك من حسن الاوفاق

ترحم حوال اللي هزيلٍ وواني

أسألك لا من لفت الساق بالساق

في ماقفٍ ما بيننا ترجماني

وبالصراط وجملة الناس مراق

وكلٍ كتابه بين عينيه باني

والنفس معها شاهدينٍ وسواق

يا رب عن لفح الجحيم اتحماني

هذا يمره بالعجل لمح براق

وهذا كما الرجلي وذاك احبياني

وهذا على حفرة زمهرير خفاق

وهذاك يدخل في نعيم الجناني

وأسألك تامر لوالديني بالاعتاق

من النار حيثك ربي المستعاني

والمسلمين اللي على الحق شفاق

عطيتك جزله ولابه مثاني

اللي يصلون الفرايض والاشراق

حجاج بيت الله وصوم ارمضاني

وأدى الزكاة وقام عدلٍ ولا باق

وموحدينك يا جزيل الحساني

تمت وصلى الله على حسن الاخلاق

محمدٍ ما هب ريح اليماني

الشاعر:

غانم بن علي الجنفاوي الشمري من أهل القرن الرابع عشر الهجري شاعر وراوية روى عنه بعض مدوني الشعر ولا أعلم متى وفاته رحمه الله.

جميييل

يعطيك العافية

بسم الله

مع اني مافهم كثير بالشعر العام الا اني وجدت في كلامه من الحكمه ونصيح الطيب الكثير.... ولكن اذا كان هو بالقرن الرابع عشر يقول كذا اجل لو يشوف زمنا هذا ايش يقول؟؟!!!!!!!

سلمت اناملك غاليتي ع النقل الجميل
الله يرحمه ويسكنه الفردوس الأعلى من الجنة

جزاكم الله خير للمرور شكرا

يعطيك العافيه ع الطرح

لاهنتي

شكرا للمرور يعافيك الله

الف شكر روح ع الخاطرة الرائعه

يعطيك العافيه