بعض اللاعبين يلعب بدون عقل

بسم الله الرحمن الرحيم


في البداية استغرب من ادارة النصر انها لم تراجع جدول مباريات الدوري، وهل الجدول عادل بين الفرق أو لا، خاصة في وجود
متعصبين في لجان الاتحاد و منها لجنة المسابقات، التي تضع المكايد للنصر من بداية الدوري، وللاسف أن هذي المكايد في كل
موسم، وادارات النصر لا حس و لا خبر..

معظم فرق العالم يراجعوا جدول الدوري ويشوفوا هل هذا الجدول عادل او فيه تلاعب لارهاق الفريق، حتى بطولات الحواري
الفرق تراجع مبارياتها، واذا لاحظت شي في الجدول اعترضت حتى يتم تعديله..

من البداية والنية مبيته من المسابقات لمحاولة وضع المطبات لتعثر الفريق، بعد توقف الدوري بسبب ايام الفيفا عاد الفريق ولعب
مباراة قوية أمام الاهلي، و بعد التوقف الثاني عاد الفريق ولعب أمام الشباب، عكس المنافسين بعد التوقف يلعبوا ضد فرق
ضعيفة، ايضا لعب النصر في اسيا امام الاستقلال يوم الثلاثاء ، و الهلال لعب في اسيا يوم الاثنين قبل النصر، ثم عاد النصر ولعب ضد الخلود في الدوري يوم الجمعه، والهلال لعب في الدوري يوم السبت، يعني المنافس ارتاح يومين زيادة، هذي فيها
ظلم واضح على النصر، وهذا الظلم الى الجولة الماضية، ولا ندري ماذا تخبي المسابقات للفريق في الجولات القادمة..



عندما يصل الاعب للفريق الاول يعني انه تمرن سنوات طويلة وعلى يد مدربين عالميين، حتى ان بعضهم وصل للمنتخب وخدم
المنتخب و احتك بمنتخبات عالميه، ثم ينزل بعض اللاعبين للملعب، و تستغرب من الاخطاء اللي يرتكبها هذا الاعب، حتى ان بعض هذي الاخطاء لا تحدث من لاعب ناشئ، ما ادري بعض اللاعبين في بعض المباريات، يترك مخه في غرفة الملابس ثم يدخل
للملعب، وتشوفه في الملعب بدون عقل، ما يدري كيف يقطع الكورة ولا يعرف كيف يغطي الاعب المنافس، تحسه لاعب مبتدئ، حتى
الاعب العادي اللي لا ينتمي لفريق محترف لا تحدث منه الاخطاء اللي تحصل من بعض لاعبي النصر..

اتمنى من لاعبي النصر التركيز و اللعب بعقل، سنوات طويلة و انتم تتدربون، المدرب ما بيجلس يعلمك على اشياء في الملعب
تعلمتها في الفئات السنية، يعني تبغى كل مدرب يجي يعيد عليك كيف تمرر و كيف تتحرك و كيف تغطي، ياليت يتم معاقبة
الاعب اللي يكرر الاخطاء انه يروح يتدرب مع الفئات السنية لمدة اسبوع حتى يتعلم ما يكرر الاخطاء، خلاص وصلت للفريق
الاول يعني تكرار الاخطاء ممنوع و تعتبر جريمة للاعب، والمصيبة ان بعض اللاعبين عادي عندهم و يضحك وما يدري انه
ارتكب جريمة في حق الفريق..