مدونتي (عايد السهلي العنزي )...

القلب قلبك .. والمشاعر مشاعرك
اجرح وعذب يا حبيبي حلالك

غالي ولوتخطي على القلب عاذرك
سو الذي يرضيك واللي في بالك

خابرني ميت في غرامك.. وخابرك
تموت في حب التملك .. وانا لك

ان كنت صاحي مع خيالك اسامرك
وان نمت في حلمي يجيني خيالك

يعني على كيفك وذوقك وخاطرك
اجيك انا كلي ... وكلي فدالك

اموت في غيضك وعقدة نواظرك
واموت في صدك واموت بوصالك

واموت في همسك ليا جيت احاورك
وفي دهشتك .. لاقلت ادور بدالك

واموت لاشع الضيا بأجمل صورك
واغيب معها .. وألتهي في جمالك

وتقول وش رايك؟ واقرب واشاورك
انت الله اعلم وش نهاية دلالك

وتضحك وتفرج بالسعاده سرايرك
وانا على ضحكة شفايفك.. هالك

ذوبتني مابين ملحك . . وسكرك
واهديتني قلبك..وروحك..وحالك

أقدر جهودك في حبي .. وأقدرك
وأسكنك بين الحنايا .. لحالك

ومني جزيل الشكر والقلب يشكرك
على سموك يالغضي .. وإكتمالك

سبحان من كمل وصوفك وصورك
وخلا مجالي يندمج في مجالك

إن غبت عني قمت اهوجس وادورك
وأنشد عن ديارك .. واجي وآعنالك

وإن جيتني برضاك .. ماجيت مجبرك
يا مرحبا ... والقلب فز ودعالك

لآضاق صدرك عالي الصوت جره
لو كان قلبك ما يطاوعك بسرور

دنياك لو تسوى من الحِزن ذرّه
ما كان تاليها توابيت وقبور

وما كان للكافر بعمره مسره
وما شفت في ملكه ملايين وقصور

العمر يمضي بين حلوه ومره
والموت حق وقابض الروح مأمور

دام الحياه الفانية مستقره
ورزقك يجيك وبين الأجواد مستور

لا تنشغل بالوقت برده وحره
واحذر تصير بقسمة الناس مقهور

وحكم القدر لاجاك خيره وشره
أشكر عظيم الشان والذنب مغفور

والمجلس اللي يزعجك لا تمره
خله تراك بشوفته منت مجبور

والرجل سقها في صحاصيح بره
ومد النظر مابين ريضان وزهور

لا صار وجه القاع ما فيه جره
والمشي حافي والثرى تو ممطور

ساعات صمتٍ ما وراها مضره
تسوى الكلام اللي به إذنوب وإشرور

أطلق خيالك وأترك النفس حره
وخل الطبيعه في حياتك لها دور

وبالليل لا بانت نجوم المجّره
أذكر بديع الخلق بـِ إحـساس وشعور

واسجد لرب الكُون مره ومره
وإحفظ لسانك وأترك الكذب والزور

وفروض ربك خلها مستمره
وطاعتّك لا يدخل بها نقص وقصور

لا جيت تنشدني عن الحـال وشلـون
................................ حالـي بـعـد فـرقـاك بالحـيـل شيـنـه
والله لــو تقـفـي فــلا ظـنـي تـهــون
................................ لـو ذقـت مـن فرقـاك طعـم الغبيـنـه
لحـد ٍ يلـوم اللي من البعـد مفــتـون
................................ كل ما طرالـه شـي صـاح بونيـنــه
قلبي وروحي ياحبيبي يعــرفـون
................................ ان الوفـآ بالحـب صعــب ٍ يــقــينـه
الحب اكبر من ردى شخص ٍ يخون
................................ مـا تفهـمـه حـتـى العـقـول الفطيـنـه
ما دامنـي فـي حبـك اليـوم مرهـون
................................ كــل مــا تذكـرتـك طـرالـي حنيـنـه
والله مـــا مـثـلـه شـبـيـه ٍ بهـالـكـون
................................ سبـحـان مــن مـيّـزه مـيــزه ثمـيـنـه
كل الملا فـي حضرتـه مـا يسـاوون
................................ مبسـم شفاتـه قولـوا رمــوش عيـنـه
حتـى حروفـي فـيـه دايــم يـطـرّون
................................ والروح في داخـل ضلوعـه رزينـه
آهلّلـه مـن داخــل اعمـاقـي مــزون
................................ مشـاعـر ٍ مــا عاشـهـا فــي سنـيـنـه
والمشكله من غاب صاحـوا يونـون
................................ مـا كــن غـيـره بالبـشـر فـيـه زيـنـه
تـرى قصيـدي فيـك لا تلفـت عيـون
................................ لـكـن هـــذاك اول وحـبــك بحـيـنـه
زينـتـهـا يـمـكـن عـيـونـك يـحـنــون
................................ ترجـع وتبـنـي داخـلـي لــك مديـنـه
لا تلومنـي لـو شفتنـي منـك مغبـون

................................ صـارت حياتـي كـل ابوهـا حزيـنـه
لـو ربعـي الحـازم بحـبّـك يحـسّـون
................................ جـرّووك مـن بيـتـك لبيـتـي رهيـنـه

انا اللي قلت في نفسي .. احبـك.. وابتدى التمثيل
بديت اكذب على نفسي .. و اقول انك نظر عيني



خطاك انك تصدقني .. تبادلني الـهـــوى و تميل
صدقت بكل اشــواقك .. وكــــــاذب كل ما فيني



خدعني واهم إحـــــساسي .. بلا غاية ولا تحليل
ظلمتك يوم جـاريته .. أجـامل .. و انت تعطيني



لقيتك غـــارق بـحـبي .. ولا لي للأمــــر تبديل
حرام أحطم احلامٍ .. بناهـــا الحب .. بيـــديني


وسايرتك ..على كيفك .. لـقيت القلب حبّك حيل
وفجأة صرت لي نبضي .. سكنت أقصى عناويني


ولا فكّرت في جرحــــك .. ولا ودي تذوق الويل
ولا حبــيــت نـتــفارق .. وعينـــــك يــوم تبكيني

ولكن بانت الكــــــذبة .. وعــــــزّم قلبي التعديل
تنبّه بعد مـــــا فــــــات الأوان .. ومرّت سنيني


علينــــا دارت اللعـبة .. مثـل دورة نهار و ليل
تحب وكنـــت انا لاهي .. عشقتك و انت تجافيني


خلاص الحــــزن ما ينفع .. تبادلنا الهوى تمثيل
خسارة صــرت أنا أحبك .. و انت اللي تجاريني

أوفيت في تجريح قلبي وكفيت
قلب يحبك وأصبح اليوم مطعون~~
حبيت غيري وعن هوانا تخليت
وأول حلفت وقلت عزاه مااخون~~
الله وأكبر ياحبيبي تناسيت
حب جمعنا وأغلب الناس يدرون
أول خفوقي بالمحبه لكم بيت
واليوم بأشباح الحزن صار مسكون
كم مره في تالي الليل ونيت
وكل الحشا في داخله جرح وطعون
من حر مابي يابن الاجواد هليت
دمعي وقلبك داخل العين مسجون~~
واذا شفت عاذلي تضاحكت وسويت
نفسي سعيد ه وداخلي حزن مكنون~~
أول تبادلني الغلا ماتغليت
واليوم عندك يرخص الحب ويهون~~
مدري زعل ياصاحبي يومك ابطيت
عن صاحب يحفظ الحب ويصون~~


ابشر خفوقي قد نساكم ولاقيت
شخص وفي صادق الحب مزيون~~


مليت تعذيبك وانا منك مليت
وشلون اسامح جارح القلب وشلون~~


من عقب ماني في غيابك تهنيت
تبغاني ارجع للحزن انت مجنون~~




وين انت يوم اني نخيتك وناديت
توه طلع لك ,, سمع واحساس وعيون


تدري به امر واحد فيك حبيت
ويمكن عشانه صرت لك حيل ممنون~~
اني عزفت القصيد عقبك ورديت
واصبحت اكتب شعر والناس يقرون ~~

الغلا قصه عجيبه تبتدي بضحكه عيون
قصة فارسها مشاعر نابضه بأحلى غرام


نصّها كلمة [أحبك] ياحبيبي للجنون
تنطلق من قلب عامر بالمحبه والسلام

هذي هي قصة غرامي يوم جيتك ياحنون
مابقى شيء بكياني غير حبِّك بـ احتدام.!

جيت لك تضحك شفاهي بإبتسامات الجفون
جيت لك والقلب غارق في عبارات الكلام

ماتصنّعت المشاعر لاجل أبرهن من أكون
كان همِّي اني آآصل ساحلك يا احلى غرام

أبتسم ساعة أشوفك وأنسى أيام الشجون
و أتخذ لأجلك مساحه في مواعيد الزحام

لاتلاقينا وشفتك [قاسي] الغربه يهون
والفرح يسري بدمِي ويخترق صلب العظام

وإن تفارقنا دقيقه مالت اوراق الغصون
والدقيقه في عيوني شفتها ألفين عــام

الغياب..!!ياهو غيابك صب لي كاس المنون
أشربه ظلم وتجنِّي وأرتويبه بانصدام

الغلا ماهو حكايه تعتبر ضمن الفنون
الغلا عشته بقلبك ياقمر وسط الظلام

لو درا بصادق غرامي[الغدر]حرّم يخون
ولويعيشه كل مذنب إلتزم بعد الحرام

والبلابل لو تحسَّه زادت أنغام اللحون
وبه تغنّت واهتفت به..وغارت اسراب الحمام

والبحر لو قاس حُبّي صارت أمواجه سكون
وقال أنا قطره وجف وأبهر أحلام الانام

حتى قيس اللي تصدّر قايمة أهل الجنون
واللي أهل العشق أخذوا من أساطيره وسام

ماوصل عشقه بليلى مرحلة ضم الحضون
ولاتحّدى في غلاها لذة ..[انفاس].. المنام

وعنتر وعبله غلاهم باهت ماله اي لون
بعد ماشخًّصت قلبي حُبهم فيه انفصام

كل حُبٍ غير حُبي مثل همَّال المزون
يستمر وقت والسحاب وينتهي وقت الغمام

وكل شعرٍه غير شعري مايفي باللي يبون
تكتب حروفه احبك ونيّته بالانتقام

أتحدى ... وأتحدى ... وأتحدى ... من يكون ..!!
إن قلبٍ غير قلبي حُبه صادق بالتمام

وإن كلامي ماعجبهم يفعلون مايشتهون
يمكن لاشافوا ولا عندهم ينشاء اهتمام

الغلا قصه وصارت بيني وبينك [جنون]
حكيتها بشعور قلبي قبل مايبدا الكلام

الغلا واقع أعيشه ..معك مايرضى الظنون
واقع أجمل من خيال ..واقع نبراس الوئام

بطلبك قبل أنتهي كانك لـ إحساسي تصون
إن لحظات التواصل نغتنمها اغتنام

مانبي الايام تمشي والمشاعر يتعبون..!!
والخطاوي الهاويه في سراديب الخصام

والامـــــانه في النهايه ياحكي حُب العيون
لافهمت حروف شعري ضمَّها بعد الختام

تكفين يا طيور الحرار افزعيلى
...........................ابى عن ديار الاهل منك اخبار
تكفين حومى فوقهم وارجعيلى
........................... وإلا ان حصل لك حومه داخل الدار
تكفين حول بيوتهم دوريلى
................................سبعة فروخ يوم اخليهم صغار
شوفى ضناى وعودى وانكفى لى
................................واشلونهم يا علهم صارو كبار
نسوا دفاي ونومهم فى شليلى
..............................وش علمهم يا علهم بطول الاعمار
قولي لهم ان امكم لها عويلي
..................................خمسه سنين دمعها دوم مدرار
وقولي لهم إني علي طول ليلي
....................................أنوح وليا قرب الصبح أنهار
وقولي عيوني دايما له هميلي
....................................تبكي ليا شافت من الناس زوار
كل يوم اقول غدى حديهم يجيني
..................................راحت سنيني مابهم واحد(ن) زار
وانا اللي من سبت سوات الحليلي
......................................حالي تردى كل ماله وينهار
وفرقا ضناي اللي تردت بحيلي
...................................كني على شوفتهم اصلى على نار
ياويلي كان الله عجل رحيلي
.................................وانا لي سنين ابي لو هي اخبار
ياعونة الله من يبي يرتكيلى
................................ ليا جارت علي بأمر الله كل الأقدار
تنكروا من يدخلون الدخيلى
.............................واللي بوسط ديارهم يامن الجار
قولي لهم ياطيور قلبي عليلي
............................الله يكافي قلوبهم صارت احجار
وانا اللي لبراق الخيال استحيلي
................................واقول ياعل ديرتهم للأمطار
تكفين وسط ديارهم صوتيلي
.............................شوفي عسى لأسمي مع الناس تذكار
وقولي لمن نسيانهم يستحيلي
...............................ياللي نسيتوها ترى الوقت دوار
ياهيه ياللي بالسما لك هديلي
..............................ردي خبر تكفين يكفي امرار
شوفي هاك اللي نومهم في شليلي
...................................من اذان المغرب لوقت الأسحار
شوفي هاك اللي ماتهنى في مقيلي
.................................إلا مقيل معهم كبار وصغار
وقولي لهم ان كان حملي ثقيلي
...............................مره يجون وعقبها شي ماصار
وانا يتولاني كريم(ن) جليلي
................................ياعلني في جنّة وسط الأبرار

سولفوا تكفون لا عاد تسكتون
قبل لا أهوجس وياتيني بلاي

السكات يزود طعوني طعون
وتنكسر لا جا على راسي عصاي

سولفوا لو ما بغيتوا اتسولفون
قبل لا اقعد في الحزن رايح وجاي

واضحكوا لو بالعماله تضحكون
وجاملوني لو يضايقكم حكاي

لي وليفٍ راح جعله ما يهون
هو دواي وداي أو داي ودواي

راح لكن طيف زوله في العيون
مرةٍ قدامي ومرة وراي

وإن سكتوا جا وهو طيفه يمون
رحت أهوجس له وأبين له ولاي

مكسب عيوني من الفرقا مزووون
تمطر لطاريه والبرق ؟ أصدقاي

كل ما طروه لو هم يمزحون
احرموني من غداي ومن عشاي

أدري إنه ما تناسى الود كون
تسمع إذنه في قفاي اللسن عداي

وكانهم قالوا نسيته يكذبون
وإلا أنا فيه أمتلك نظرة وراي

كان حبه لي على خبري مصون
والله ان كني بقدري وبغلاي

ذي بقايا الحب وأطلال الجنون
والله أعلم في ضميره وش بقاي

غير طيعوني ولا عاد تسكتون
ولا والله إن أسمعكم بكاااي

ياقو قلبك على الصّده ويا صُبرك
وياوسع صدري على صدك ويا صُبري

وياطول عمرك بذاكرتي وياكُبرك
وياشيب عيني بشيّب عاد ذا كُبري

والله لون حمل صبري فوقكان تبرك
والله ولو تعتذر منت بعلى خبري

ان ما جبرك الغلا ما اقدر على جبرك
ياللي على ارض الوفا ما شبرك بشبري

تزعل وترجع وتلقاني على خبرك
وانا انكسر لك واجيك ادوّر لجبري

طيفك وذكراك طيلة غيبتك سبرك
وشوقي لشوفتك طيلة غيبتك سبري

امحق وليف ومحبه والا اقول ابرك
حسبي عليك اعشقك وانت اتحفر قبري