شلون يسوون الأشكال بالألعاب النارية؟‏

شلون يسوون الأشكال بالألعاب النارية؟

تشوف شكل نجمة ولا دائرة ولا مربع ولا قلب … الخ شلون يضبطونهم جذي؟

مقدمة بسيطة

فن صناعة الألعاب النارية من الفنون القديمة اللي نشأت في الصين خلال القرن السابع الميلادي وكانوا يستخدمونهم لطرد الأرواح الشريرة عن طريق صوتها العالي وهم كنوع من الصلاة لجلب السعادة والازدهار. حتى يقولون استخدموهم في الحروب ضد الشعوب اللي ما كانوا يعرفون عنهم وخرّعوهم عشان ينحاشون مساكين.

استخدام الألعاب النارية كان محدود للشخصيات والمناسبات الملكية لعدة قرون بس بعدين صارت عادة للمناسبات السعيدة بشكل عام، لي الحين نشوف اثر هالاعتقاد مع تزامن احتفالات الاعياد الوطنية بالكويت هالأيام وكلامهم عن عرض الألعاب النارية اللي بيصير عاد خنشوف شلونه.

مع الزمن انتقل هالفن للدول الأوروبية وطوروا من تقنيته ونشروه عالمياً حتى صارت مثل الجراقيات الصغيرة اللي نشوفها بالبقالة أو سوق المباركية وسوق الجمعة عندنا.

إذا نبي نجاوب على سؤال الموضوع لازم نعرف شلون يسوون الألعاب النارية بالأساس:

تقريباً كل الألعاب النارية الكبيرة اللي يستخدمونها بالاحتفالات الضخمة يصنعونها يدوياً لي يومك هذا، العملية وايد دقيقة وحساسة ما يقدرون يخاطرون ويخلونها آلية عشان لا ينفجر شي بالغلط ويدمر الدنيا . مهما اختلف حجم أو شكل الألعاب النارية كلهم يصيرون بقوطي ملفوف مثل اللي تشوفونه بهالصورة. والاستعراض الواحد يبيله آلاااااف من القواطي النارية.

داخل القوطي تشوفون هالشكل تحت، فتيلة موصلة ببارود وداخله كرات أو طلقات نارية مليانة معادن أو أملاح اللي تعطي ألوان مختلفة، يحطونها مرتّبة على الشكل اللي يبونه يطلع لما تنفجر الطلقة، مثل ما تشوفون على يمين الصورة صارت على شكل نجمة. يعني السر كله بترتيب طلقات الألوان داخل القوطي!

أيام اول كانوا الناس يشبون الألعاب النارية الضخمة يدوياً وبس تشب يركض ركض اليهد عشان لا يتعور ، ووايد كانوا يتعورون وتصير حوادث. هالأيام تطورت هالعملية وصاروا بس يرتبون القواطي وبعدين إطلاقها يكون عن طريق الكمبيوتر عشان يتناغم مع صوت موسيقى ولا كلمة ولا اي شي. هذي صورة العمال وهم يرتبون الألعاب النارية في النهر الشرقي بنيويورك للاحتفال بعيد استقلالهم سنة 2000م.






الصورة هذي تحت حق عرض سووه حق اعادة افتتاح معرض الفنون الحديثة بنيويورك سنة 2007 ويسمون هالشكل Transient Rainbow، كلفهم العرض كله 140 ألف دولار أمريكي واستمر بس 32 ثانية!




الرقم القياسي لأكبر عرض ناري تملكه دبي في افتتاحها لفندق أتلانتيس سنة 2008، العرض استمر 8 دقايق ونص واستخدموا فيه خمسين موقع و 97 اخصائي العاب نارية،،، كلّفهم 2.7 مليون دولار أمريكي.




شنو “وصفة” الألعاب النارية؟
بشكل عام بارود وكربون عشان تنطلق الألعاب النارية، وزيادة عليه يضيفون أملاح ومعادن لتغيير ألوان الانفجارات.
الجراقيات والألعاب النارية الصغيرة اللي نشتريها من المحلات هذي مو أكثر من بارود وكربون عشان يعطي انفجار صغير.
شنو يستخدمون بالضبط حق الألوان؟
طلقات الألوان اللي شفتوها فوق يحطون فيهم مواد مختلفة حق اللون المطلوب، مثلاً:
يحطون أملاح الكالسيوم حق اللون البرتقالي.
الألمنيوم حق اللون الفضي أو الأبيض، وهو اللي يحطونه بالأعواد اللي تشب وتعطي شعلة بيضه تطوّل.
الحديد يعطي شرارات وبريق والظاهر هم يحطونه بالأعواد مع الألمنيوم.
باريوم Barium حق اللون الأخضر وهم يساعد على تثبيت توازن المواد المتطايرة بالطلقات.
سيزيوم Cesium يعطي لون أزرق نيلي.
نحاس يعطي لون أزرق مخوضر.
البوتاسيوم يعطي وهج بنفسجي على وردي.
الليثيوم حق اللون الأحمر.
صوديوم حق اللون الأصفر.

كووووووول روعه اشكرك حبيبتي طبعووو

يعطيك الف عافيه يالغلا
لاعدمناك

يسلمووووووعلى مروركن
لاخلاولاعدم

يعطيك الف عافيه يالغلا لاعدمناك

يسلمووووووعلى مرورك
لاخلاولاعدم

يعـطــــيك الـعافـية عـ الطــرح الــرائــــع لاهــنــتي

معلومات جديده أشكرك يالغلا

تسلمي يالغلا على المعلومات

نااااااايس ناااااايس

كان نفسي اعرف الفكره ذي من زماااان

جد شكرا وجد روعه وجد ابداع الموضوع وعجبني