خلقت في الدنيا وأنـا ما معـي شـيّ

قصيدة للشاعر


مبارك بن فايز البخيِّت آل محمد السبيعي

وقصة هذه القصيدة كان الشاعر مبارك فايز البخيِّت السبيعي
في منطقة بحرة محافظة جدة عام 1395هـ
وكان بيته مفتوح لجماعته وجميع من يقصده وفي احد الايام سيّر عليه مسايير من جيرانه وأبناء عمومته وقاموا ينصحونه عند الكرم وكان يسوي لهم القهوة على النار ودق البهار في النجر
وهوجس من كلامهم وبدل ما يحط البهار في الدلة حطه في البراد فانتبه له بعضهم فقال وش بلاك يا البخيّت عسى ما شر ؟
تراك خربت الشغلة ! .. قال : لا أنتم اللي خربتوها
ومن الغد قالوا له : هل الهوجاسة التي بالأمس أتت لها بنتائج
فقال : نعم

وقال هذه القصيدة المشهورة



سجه مـع الهاجـوس طبيعـة ٍ لـي ّ
طبيعـةٍ بمـوت ما جـزت عنهـا


أشكي على الخلاق وارفع لـه إيـديّ
لاكثـرت الأفـكـار يـفـك منـهـا


أما الكرم قد فـاز بـه حاتـم الطـيّ
حتى الفرس من شان ضيفه طعنهـا


خلوني أكرم في حياتـي وأنـا حـيّ
ولا مت مـدري جثتـي مـن دفنهـا


خلقت في الدنيا وأنـا ما معـي شـيّ
وبروح منهـا ما معـي شـي منهـا


مسكين ياللي تحسب الواجـد شـويّ
والعافيـه لـو تنشـري وش ثمنهـا


يا جاهـل الدنيـا تراهـا كمـا الفـيّ
يا مخبل اللـي فـي حياتـه ومنهـا


إن ناحرت لك قامت تـروح وتجـيّ
مثل الذلـول اللـي طويـلٍ رسنهـا


وإن أدبـرت خلتـك طايـح ومرمـيّ
وكم واحـد ٍ لـه حاجـةٍ ماضمنهـا


لابد ما نرحـل عـن المـزح والغـيّ
ونسكن بيـوتٍ قبلنـا مـن سكنهـا


النفس مثل الغصن عايش على الـريّ
ولولاه كـل النـاس عافـت وطنهـا


يالله عسى الحسنات تقضي على السيّ
لا قربـوا للنفـس ذرعــة كفنـهـا

الله يعطيك العافيه على انتقاء هذه القصيده
المتميزه التي ابدع فيها شاعرها
وصور مشاعره والحياه بطريقة ايمانيه بحته
ضامي بطوله

مشكووووووووووووووووووووووووووووووووره

يعطيكم العافيه ع مروركم العطر
لاهنتم