الفيصلي سلمان

الفيصلي سلمان

يالفيصلي سلمان يا نسل الأحرار
يا راعي الطالات في كل سيره
ما جابن الخفرات مثلك ولا صار
حرٍ ينومس في هداده مطيره
سيفٍ يعدّل كل خاين وغدّار
هيبه وسطوه فالأمور الخطيره
ولكبرت القالات ساطي وجبار
تودع على جمع المعادي كسيره
يشهد لك التاريخ في كل مضمار
حلاّل صعبات الأمور العسيره
كم من دخيلٍ يزبنك خايف الثار
ضلعٍ يذري فالليال المذيره
حلياك حرٍ لأبرق الريش نثار
يودع مكامين الحباري ثريره
وألا كما شامان والسيف بتار
سيف الزعيم اللي يقود المغيره
عبدالعزيز اللي له أمجاد وأذكار
أرسى قواعدها وقاد المسيره
اللي ضرب للدار غبات الأخطار
لين أذعنت كل النفوس الشريره
ساق المهر عمره على قحص الأمهار
الدين سيفه والعزايم ذخيره
لين أعلن التوحيد في كل الأقطار
في واحد وخمسين وحّد مصيره
من عقبها والدار في حكم الأخيار
اخوان نوره سعد منهم قصيره
أنتم هل العوجا طويلين الأشبار
وأنتم هل العليا حماة الجزيره
وأنتم هل الوقفة ليا شبت النار
وأنتم هل الفزعه ليا جاء نذيره
اللي يعاديكم شرب كأس الأمرار
يموت من غله وكبده مريره
تستاهلون الطيب والبن وبهار
وتستاهلون المدح في كل ديره

خالد العبدالله القريشي - الكويت

صح لسان القريشى

والف شكر روح