جبل بونشاك الفتاك . سفرتي لاندونسيا . قبل اسابيع .

بسم الله الرحمن الرحيم ..

في البدايه . سـأقول .. بأنني من الاشخاص الذين لايحبون نشر , مواضيع السفر والرحلات , لانها مُتعبه , ولأجل هذا المنتدى , واعضائه الغالييين . سـ اتحمل التعب وسـأقوم بإنزال تقرير سفرتي لأجل الامتاع والتفاعل . سأكتب بعض التفاصيل مدعومه بالصور , اتمنى ان تنال على اعجابكم ..



بدايه السفره
لا اعلم بالظبط كم التاريخ
كل ماعرفه انني حجزت يوم الثلاثاء , على طيران الاماراتيه واقلعت يوم الاربعاء الساعه الرابعه فجرا متوجهاً لدبي ومن ثم الاقلاع , الى جاكرتا والوصول الساعه الثانيه عشر ليلا من يوم الخميس .. وايضاً اعلم انه بنفس اليوم المشؤوم لدى الهلاليين , اي بنفس يوم مباراه الهلال واصفهان ..

طبعا
كان الوضع عندي ملخبط .
لاني مادري شلون حجزت , وأكدت الحجز واخذت الأوكي , وانا ماجهزت شي , وهي اشبه بالمغامره بكل امانه لان ماقدامي الا يوم واحد حتى اجهز كل الاغراض , والحق الطيران ..

لدرجه الغرابه وعلى غير العاده
بعد الحجز وتأكيد الحجز طلعت مع اخوياي للبر في الليل وجيت الفجر ونمت , ولازم اصحى العصر حتى ارتب الاغراض واشتري بعض اللوازم ولازم اكون بعد العشاء مخلص حتى اروح للمطار , لأني ماني في الرياض كنت في القصيم , وخلصت اموري الساعه 10 تقريبا في الليل , وسيدا للمطار , بلا ساهر بلا بطيخ وصلت المطار بعد المشقه الساعه 2 تقريباً على طول زبطت الاغراض ودزيتها بالطياره , ورحت ازبط وضع الختم والجوزات ومن هذه الامور حتى دخلت الصاله الساعه تقريبا 3 وعليها , ولحسن حظي تأخر الاقلاع لمده ثلث ساعه عن الموعد المحدد وهذا اللي خلاني اطير معهم ولا كان سافط حتى الرحله الجايه , الحمدلله تيسرت الامور كامل التيسر , وركبنا الطياره , والمفروض وصول الطياره بعد ساعتين الا ربع بعد الاقلاع ( اقصد الوصول الى دبي ) طبعاً الا اننا وصلنا مطار دبي وجلسنا ندور فوق المطار لمده ساعتين , واحنا ندور في المكان نفسه , اعرفو ان راسي بدأ يدور وتسبدي بدت تحوم صراحه مره الشمس دخلت من جهات الطياره كلها لأن كابتن طيار يدور بنفس المكان , والحال وقتها يرثى لها لجميع الركاب , من حيث الدوخ وحومه التسبد , ولا نعرف وش السبب , لين الله يسر وجاء المضيف منصور احمد اماراتي ومن اروع المضيفين خلقاً وادباً واسلوباً . فسألته عن المشكله , فقال ان دبي عليها ضباب كثيف , وانعدمت الرؤيا تماماً . واحتمال نحول الوجهه الى مسقط , فقلت لاحول مسقط مافيها رحلات دوليه , قال نجلس بعدين نرجع لدبي وتتوكل على الله , قلت طيب انا الترانزيت في دبي 4 ساعات والحين راحت ساعتين منها باقي ساعتين وتقلع الطياره لجاكرتا وش السواه , قل يسرها الله , ( انا كنت مصمم اوصل جاكرتا بنفس الموعد ) لشي بنفسي , المهم ولا شوي والحمدلله تيسرت الامور واعلنو ربط الأحزمه للهبوط , وهبطنا بسلامه , وانا كنت ناوي في الأربع ساعات اتسوق شوي في مطار دبي لانه عالمي بس راحت علي ساعتين , والمطار كبير وبوبات وشغلانه , فرحت اخذت رقم البوابه من الرحلات الألكترونيه وبسرعه طلعت لكوفي شوب اخذت قهوه مع بعض المزاج الخاص ع طول نزلت لأن المسافه بين الكوفي والبوابه بعيده مره , فشربت سريع سريع القهوه ونزلت سيدا للبوابه , مامداني ازبط أموري الا ويعلنون عن الرحله المتجهه لجاكرتا , وعلى طول سيدا لخرطوم الطياره واخذ مكاني واتكي , اقلعنا ولله الحمد الساعه 11 بتوقيت الامارات . الساعه 12 بتوقيت المملكه , شوي اعلنو ربط الاحزمه واقلعنا , وبعد مازبطت القياده بالجو وتعدلت الطياره فكيت الحزام ونطيت ورى اشوف اذا في مقاعد فاضيه وحصلت الحمدلله , فاخذت لي 4 مقاعد جنب بعض , وانسدحت فيها حرصاً على النوم لان قدامي 7 ساعات مده طويله جدا , طبعاً انام عشر دقايق واصحى ساعه وارجع اتابع فيلم ساعه وانام ربع ساعه وهكذا ومن الصدف حصلت واحد اعرفه في الطياره وجلسنا نسولف , وندردش قلت بناظر الساعه شكلنا قربنا الا انه ماراحت ولا 4 ساعات ياساتر الوقت ممل جداً . والحمدلله اعلن الكابتن عن ربط الحزمه استعداداً للهبوط . ( ياهلا مرحبا بجاكرتا ) هبطنا , والحمدلله كان المطار فاضي جدا لاننا وصلنا الساعه 12 في الليل بتوقيت جاكرتا يعني الساعه 8 عندنا , فاضي المطار ولا في رحلات وسريع سريع ختمت واخذت التأشيره بـ 25 دولار . لمده 30 يوم . ورحت اخذ الشنط , اخذت الشنط والعزبه والامور الفله الا شنطه وحده ماخذتها لانهم ماجابوها وفيها ملابس لي , المهم وكذا وكذا ومتى وكيف وعطلوني ساعه عطوني تعويض 50 دولار , وقالو حط العنوان ونجيب لك الشنطه بأي مكان تبيه ( طبعا انا مادري وين العنوان لأني للحين مادري وين اروح ) فاخذت ارقامهم وتوكلت على الله لبرا المطار كنت ناوي اجلس في جاكرتا يوم اريّح , ومن بكرا اروح للجبل بونشاك , طلعت وناظرت الساعه 1 في الليل والجبل يبي له 3 ساعات صارت الساعه 4 خلني اتوكل ع الله ع طول للجبل , بس لان مايفوت صراحه وجاكرتا مقرفه بالنسبه لي كلها اسواق وألعاب , ووشاطي آنشول وجوها حار ورطوبه , اخذت سواق بـ 200 ريال تقريباً بس سياره حلوه وشرحه وكبيره وتاخذ تمدد ع كيف كيفك ويكفي ان لونها اسود ^_* رحت لبونشاك ..
وصلت الساعه 5 تقريبا على اني بروح آكل من كنتاكي لانه يفتح 24 ساعه يوم وصلته الا هو مسكر وابتلش وقفت واخذت بعض الخفايف اتعبر فيها , واكلتها وتوكلنا ع الله ادور فيلا اسكن فيها , دورت منا مناك , ماحصلت اللي سعرها غالي واللي مكشوفه للجميع , واللي ماعجبتني واللي واللي , المهم كنت ادق على واحد اندونيسي من اول ماوصلت مايرد لانه شكله نايم , قلت تدري خلني اروح لسكنه , لاني اعرفه , رحت وطقيت عليه وفتح الباب وسلام وكذا , قلت ابي انام ياخوي , ( طبعاً هو في فيلا كبيره والفيلا لواحد صيني يأجرها ) وهو ساكن بملحق مثل ماتقولون فيها , لكن هالمره مايأجر الا عوايل بس , المهم ماقصر دخلني في قسم بالفيلا خاص وقال نام انت وانا ازبط امورك انا وازبط لك فيلا , والحين انت نام , قلت كفو والله دخلت وقلت ادينا شاي خدير تكفى , وزبط الشاي وشربته ودوب ع السرير حتى ماغيرت ولا تروشت لدرجه اني نايم ( بالصندل ) تكرمون هذا النوم وش نسوي . نومه الييمه بس لازم اصحى حتى اروح للفيلا اللي يدورها لي , صحيت الساعه 1 الظهر تقريباً , تروشت ولبست وافطرت مادري تغديت وجاني هو وقال حصلت لك فيلا خلنا نشوفها .. رحت معه
واعجبتني الفيلا , فيلا لوحدها خاصه لها مسبح خاص وجلسه خاصه وغرف خاصه وكل شي فيها خاص ..


اكتفي بهذه الحروف ..
وانا اختصرتها لكم بسرعه , لان مافي صور
وبيكون الوضع ممل , مع الفيلا الجديده اللي اخذتها بيكون فيه صور , لحظه بلحظه لكل شي .. حتى العوده . بإذن الله .. اذا شفت منكم المتابعه راح اكمل طبعا
اما اذا العكس ليه التعب ؟


التقرير القادم وهو يكمل هالتقرير
بيكون فيه الصور , وصور كثيره برضو عن السفره
اتمنى انه يحوز على اعجابكم , واعذروني
ع الاسلوب :wink: