ويابوي إبشر لوتدور الدّواليب بنتك إلا منّه عوى الذّيب ( ذيبه)

يابوي جعلك للبقا والمكاسيب

عمري بدونك يالذرا ويش أبي به

يابوي تسأل عن شفاك المراقيب

طلعة سواتك للنّوايف غريبه

ليه المرض مايعرف الزّين والعيب ؟

مايدري انك للمخاليق هيبه !!

أبسألك وش به غزا وجهك الشيب

والقلب لايع والنواظر شحيبه

وش بك تحاتي لانوى الموت تغريب

تخشى علينا بالليّالي الكئيبه

خذ دلّتك واركى على مسند الجيب

وعطني شماغك بتلثم وأحتمي به

ونروّح لأرض ٍ بها العشب والطيب

وتسمع كلام ٍ يالغلا تحتفي به

يابوي بنتك لاانحكى بالتّجاريب

كل ٍ يشق لهيبه الصّيت جيبه

يابوي ماني من سوات المخاريب

اللّي تجيب لعليَة القوم خيبه

وماني من اللّي لامشت حفّها الرّيب

أنا من اللّي مايدنّس حليبه

مرفوع شاني عن غرام المكاتيب

وأكبر من انّني أرتضي بالحبيبه

أنا غرامي لاابتدوا بالتّراحيب

نفوس الأوادم في وجودي رحيبه

وان كان زيني فتنة ٍ للمصاويب

أحط وجهي بالحريق ولهيبه

زيني أبيعه وأشتري سمعه الطّيب

اسم ٍ ينومس بالصّروح الذ ّهيبه

وان كان عندي ( بالحلا) شي ٍ اصعيب

عندي جدود ٍ مارضت بالغليبه

دموع القبايل في لقانا مساكيب

كن المقابر لاحضرنا قريبه

خضّبت لك كفّي من العز تخضيب

ورفعت راسي للنّجوم الصّعيبه

والله لأسدّك بالفعول المصاليب

والله لأشيلك بالرخا والمصيبه

طلع المعالي ماانحكم للشّواريب

بنت ٍ وأناطح فارس القوم طيبه

ويابوي إبشر لوتدور الدّواليب

بنتك إلا منّه عوى الذّيب ( ذيبه)

اللهم يالرحمن اشفي {ابوي}ومتعه بالصحه والعافيه
دعواااااااااااااتكم

طلع المعالي ماانحكم للشّواريب



بنت ٍ وأناطح فارس القوم طيبه





ويابوي إبشر لوتدور الدّواليب



بنتك إلا منّه عوى الذّيب ( ذيبه


كــــفو ..

الله يشفي ابوك ويمتعه بالصحه والعااافيه يارب

والله يرزقنا برهم..

انه قريب مجيب الدعاء..

ربي يعطيكـ العافيه ...لاهنتي

الف شكر لحضورك ولاختيارك الاكثر من راائع..
سلمتي لنا بأبدااعك وذوووقك
ولا عدمنا جديدك ...

يسلمو يالغلا علي اللكلمات الرائعه

اشكرررر لكم مروركم
تحيتي لكم