كلام في قمة الروعة

بصراحة منقول من عضو في "منتديات العالمي" اسمه "الكنت" مره روعه..

النصر يقدر ينافس على الدوري !! موضوع للعقول الكبيره ممنوع دخول المتشنجين ...............!!
بسم الله الرحمن الرحيم

... ... ... أول شي احب اقوله اني عاشق ومتيم بالنصر وما يهمني لا كحيلان ولا ممدوح ولا غيره والله اني مع الكيان وبس

انا اتحدى اي واحد يفهم كوره وابيه يرد علي .... !

الامور الاداريه لاتؤثر على الفريق في المقام الأول يعني خلونا نناقش وضع النصر من الجانب الفني البحت وهذا هو تخصصي

اللي يختلف معي في نقطتي يشوف الاتحاد كل بداية موسم قضية نور والاداره وهذا مثال بسيط

ندخل في الموضوع :

المدرب كوستاس مدرب يعتمد في طريقة لعبه على الاطراف وهذي المشكله الحاصله مين هم الاطراف ؟؟؟؟

هوساوي : لاعب قلب موهوب ولا له اي علاقه بمركز الظهير ولو اصر المدرب على فكرته فإنه بيقتل اللاعب

حسين : لاعب موهوب في الظهير ولكن يفقد شيء من اهم مميزات الظهير الا وهي ( اللياقه ) بكل اختصار وعشان كذا هو يتنرفز لانه

اذا تعب يفقد تركيزه ويرتكب الاغلاط ولو كان قدامه جناح قوي كان قلت مش مشكله ولكن مع الاسف لا يوجد.

عبدالرحمن القحطاني : لاعب ما ينفع في النصر لانه ظعيف شخصيه وما يعرف يتصرف بالكوره وبارد بنفس الوقت (يبدع في المباريات الظعيفه او مع نوعيه من المدربين المحنكين اللي يغير نفسيات اللاعبين ويعطيهم ادوار على قدهم).

الزيلعي : هذا نجم كبير ولكن هو مركزه خلف مهاجم (لاعب حر) وليس جناح كما يريده المدرب وهو بقناعته سيقضي على موهبة هذا النجم .

الغامدي : هو اللاعب الوحيد اللي ينفع على الطرف وهذا اللاعب عاجبني من زمان وفرحت بهذي الصفقه كثير .

الحلول :

كوستاس طريقته الاعتماد على الاطراف وانا عندي لاعبين في النصر مبدعين على الاطراف ( خالد الغامدي (ظهير ايمن)، يوسف خميس(ظهير ايسر) ، ناصر الصالح (جناح ايمن) ، النصار(جناح ايسر) )

مهب شرط يلعبون كلهم اساسيين ولكن هذولي راح يأدون معه لأن الادوار اللي يبيها المدرب تناسب لعبهم بالضبط .

خلنا نرجع لورى شوي وشو هي طريقة المدرب و وشو اللي حايسها عشان نحط يدنا على الجرح :

المدرب يعتمد على المركزيه في كل الخطوط الا خط الهجوم (والاجنحه كما تعلمون تعد من الهجوم) يخليه يرجع ويقوم بأدوار ثنائيه طيب وشلون توصل الكوره لمرمى الخصم ؟؟؟؟

يبي السهلاوي ومالك يرجعون للوسط والزيلعي وبينو يدخلون من الاطراف بعد ما ينسحب دفاع الخصم عن طريق رجوع السهلاوي ومالك ولكن مع الاسف السهلاوي ما ينفع لهالدور ابدا

والزيلعي وبينوا ما لقوا المسانده من الاظهره (غير الغامدي) وهم اصلا ما يعرفون يخرقون على الاطراف ( لو سعود حمود مهب مصاب كان ابدع لانه يعشق هالادوار ويبدع فيها الله يشفيه ويرجعه مثل اول واحسن )

السهلاوي : لاعب نجم ولو انه اخطأ مباراه الفتح و تسبب بالخساره ولكن هو لاعب يخلص يعني تمركز صح وذكاء ولكن اذا تبون السهلاوي يبدع حطو وراه صانع مميز مثل الزيلعي وتفرجو على الاهداف

( اللاعب هذا اشبهه بلاعب مانشستر يونايتد تشيتشاريتوا المكسيكي نفس طريقة لعبه ولكن الفرق بالحماس والقتاليه هذي مهب موجوده في السهلاوي الا في بعض المباريات ويبقى المهاجم الاول في النصر داخل الصندوق وتذكروا

ايام داسيلفا يوم كان مسوي ثنائي خطير فيقاروا يصنع والسهلاوي يسجل واخذ وقتها افضل مهاجم في الموسم وهو توه منتقل للنصر اتمنى ما احد يجحد نجوميته عشانه جاب العيد مع الفتح ولكن انا ما الومه لانه مفتقد للي يوصل له

لصانع خلفه مباشره)

مالك : لاعب يلخبط الدفاع ويعمل مشاكل للخصم ولكن يحتاج الزيلعي جنبه عشان التمرير والتحرك الثنائي

بينو : هذا عنده ميزه قويه جدا الا وهي التسديد ولكن حاليا اللاعب لياقته تعبانه وبنفس الوقت ما دخل باجواء الدوري الى الحين .

عيد : هذا نكبة الدفاع ولازم يطلع من التشكيله بأسرع وقت ممكن وتذكروا مباراة الاهلي كان النصر في البدايه يلعب بطريقة كشف التسلل وكان مظبطها عنتر ولاعبين بالاهلي لان هم يلعبون على القطات الطويله ويعتمدون

على تحرك فكتور و الحوسني ولكن في هجمه من الهجمات كل الفريق كشف التسلل الا عيد النكبه وجت هجمه خطيره وكان بيجي منها قول ومن بعدها والدفاع ضايع بسبب انهم دارين ان فيه عيد ( الربش ).

غالب : هذا يكفي اني اقول اسمه ما شاء الله عليه هذا اصغر لاعب بالنصر وهذا افضلهم والكبيتانوا القادم بإذن الله والله لو يعطونه الكبتنيه اتوقع الفريق بيتغير من شخصيتة وهذا الشيء فاقده النصر من زمان

اجل حسين مع احترامي وحبي له ولكن قائد يتنرفز من اي شي هذا مهب قائد (عندي نظره و توقع خاص فيني احس ان غالب بيشبع من رفع الكؤوس اذا صار كابتن للنصر ).

راضي : مبدع ما شاء الله عليه ونجم كبير يحتاج دفاع منظم قدامه .

عنتر و هوساوي : ما يحتاج اقول نجوم كبار

الرشيدي : هذا صانع الالعاب الوحيد اللي ممكن يعوض غياب الزيلعي

العازمي : محور هجومي مبدع له نظره للملعب وفكر وتوزيع يذكرني بطريقة لعب احمد عطيف .

عباس : لاعب مجهود وحماس ودائما يلخبط الوسط ( يبي يسوي كل شي ويفقد الكوره بسرعه) ولكن اتمنى يستغله المدرب اذا كان يبي يراقب لاعب ويتعبه .

ريان : لاعب نجم ولكن مظلوم والا هو هداف وبنيه قويه وعنده اصرار وقتاليه يفتقدها السهلاوي .

ميرسير: لاعب يذكرني بطريقة لعب فيرون لاعب يوزع صح وفكر ممتاز ونظره للملعب ولكن مع الاسف يستلم الكوره ويدور الاطراف اللي تتحرك وتنطلق ما عندك احد

(تشافي وهو تشافي لو ما لقى ناس تتحرك له صح وشلون بيستفيد من ميزة التوزيع اللي يملكها !!

بختصر كل اللي قلته لكم

# النصر عناصريا ممتاز و اراهن عليه انه يقدر يفوز على اي فريق ولكن التوظيف داخل الملعب اول شي ( ولنا في الارجنتين اكبر مثال )

# اتركوا سوالف الاستقالات وفكروا في الملعب اول شيء ولو ان الامور النفسيه عامل مهم ومساعد ولكن نحن نفتقد للاساس وهو الامور الفنيه .

بحط تشكيله ولو انها مهب افضل تشكيله بالنسبه لي ولكن براعي فيها فكر المدرب وطريقته :

راضي
يوسف خميس عنتر هوساوي الغامدي

غالب ميرسير

بينو الزيلعي

السهلاوي مالك

بحيث ان السهلاوي ما يتحرك من المنطقه مهما يصير يلزق في الحارس و مالك يساند الغامدي قليلا واما الزيلعي فانه يوصل الكوره للهجوم فقط وبينو للتسديد ولعب الثنائيات مع الزيلعي ويتفرغ ميرسير للتوزيع على الاطراف او

للزيلعي او لمالك واما غالب فهو لبداية الهجمه وللتغطيه خلف ميرسير مباشره الغامدي ويوسف شباب صغار حماس ولياقه وراح يعملون شغل كبير على الاطراف وهذا ما يبحث عنه المدرب ولم يجده في حسين و هوساوي .

ارجعو لهدف النصر على الفتح وشوفوا وشلون توغل الغامدي من الطرف وعكسها وهذا اللي ما يقدر يسويه لا الزيلعي ولا بينو ولا القحطاني ولا حسين ولا هوساوي


افضل الاوراق في الدكه :
الرشيدي ، ريان ، ناصر الصالح ، القحطاني ، العازمي ، الجيزاني

اسف على سوء التنسيق ولكن كتبت الموضوع على عجاله

تحياتي /

# اتركوا سوالف الاستقالات وفكروا في الملعب اول شيء ولو ان الامور النفسيه عامل مهم ومساعد ولكن نحن نفتقد للاساس وهو الامور الفنيه .

يعطيك العااافيه خيوو

شكرا لمرورك على موضوعي وهذا شرف لي ووسام على صدري